Daily Newspaper

United in Luton an hneh

8

Thawhleh zan khan Carabao Cup third round khelh a ni a, EPL a bul tan tha lo Manchester United chuan hnehna changin bul an tan tha a, khualmualah Luton an hneh. Inkhel dangah West Ham an chak laiin EPL club West Brom chu Championship club hneh lovin an mualpho ve thung.

Henderson inlar
United in khualmualah Luton Town an hmachhawn tum hian seasonliam taah Sheffield United-a an tirhchhuah chetha zui tak Dean Henderson chuan si nghakin bul atanga a, a chetha zui hle. EPL-ah vawi 36 ngawt inlannin vawi 13 ngawt clean sheet a nei nghe nghe a, United si nghak David de Gea aiin a chetha zawk. Luton lakah save tha tak tak a nei a, United tan kheltlak a nihzia mualchhungah chiang takin a lantir a ngaih a ni.

United hian an khingpuite thunun viau mahse goal erawh an thun lawk thei lo. Chawlhlawk dawn hnaih leh hun tawp dawn hnaiah goal an thun thei hram a, si thum laiin an chak tho thung. Chawlhlawk dawn hnaih minute 44-naah United hian penalty an hlawhchhuak a, Juan Mata chuan pet goal in, hmahruaina goal an thun thei hram a, 1-0 a hmahruai chungin chawlhlawk an hmang thei hram.

Second half-ah pawh team hnihten goal an thun thei mai lo. Hun tawp nan minute hnih chiah a awm tawh tihin Dr. Marcus Rashford chuan an goal hnihna a thun nawlh a. Hun pangngai zawh hnu minute 90+2-ah Bruno Fernades siamsak atang in bench atanga lut Mason Greeenwood chuan an goal a thun belh leh hram bawk a, 3-0 a hnehna changin fourth round an inhlangkai a. Brighton leh Preston te inkhela chak zawk zawk an hmach-hawn zui leh ang.

Luton laka che-tha tak si nghak Dean Henderson hi United manager Ole Gunnar Solskjaer chuan a fak hle a. David de Gea-a’n kum khat chhunga a tih anga kha ani Henderson chuan nikhata ti nghal thei ang hialin a sawi. United player thar Donny van de Beek chuan a vawikhat nan United tan bul a tan a, a che chhe lem lo leh viau a, goal erawh a thun belh thei ta bik lo thung.

Hammers chak, West Brom tla
Thawhleh zana inkhel dangah Premier League club West Ham United leh West Bromich Albion te chuan hun inang lo tak an tawng a, Hammers in 5-1 ngawt ahnehna an chan laiin West Brom chu championship club Brentford hneh lovin an tla ve thung.

West Ham hian an mualah Championship club Hull City an mikhual a, 5-1 ngawtin an lo sawp. Hammers tan hian Robert Snod-grass goal khat bakah Sebastien Haller leh Yarmolenko ten goal hnih ve ve an thun.

Inkhel dangah West Brom chuan Brentford an mikhual ve thung a, tum hnih hma an hruaina an humhim zo lova, hung pangngaiah 2-2 in an inhnehtawkin penalty-ah an chak lo zui. Penalty-ah hian Championship club hian 5-4 in hnehna an chang a, fourth round an inhlangkai ta a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy