United in Nottingham an lehthal

EPL club lian Manchester United chuan Old Trafford-a an mikhual Nottingham Forrest lakah si hnih an phurh hmasak zet hnuin 3-2 in hnehna an chang let a, an mualah point thum hlu tak an hmu.
Khelmual ropui Old Trafford-a lenglut Nottingham Forrest hian tha chungchuang takin bul an tan a, inkhel tan atanga minute li chhung lekin goal hnih an thun nghal der. Hma taka goal an thun hi an humhim zo lova, tlem zawk an nih hnuah penalty an chawi leh zel vangin team liam lakah uiawm takin point an hmu zo lo.
Old Trafford lenglut Nottingham Forrest tan hian minute hnihna lekah Taiwo Awoniyi chuan hmahruaina goal a thun. He goal hian mualneitu a barakhaih chiang hle a, United tantute mak tiin an hawi ka hau. Goal an chhuah atanga minute hnihna lekah mak leh zual zawk a thleng a, Nottingham tan Willy Boly chuan an goal hnihna a thun zui leh zat a. Minute li chhung leka United lakah Nottingham Forrest in goal hnih an thun hman hi thil mak a tling.
Bul tan chhe viau mah se United an insiamtha thuai a, darkar khat tling hmain an si phurh an sut zo hman. Minute 17-naah midfielder Christian Eriksen chuan goal thunin an si phurh a sut. Na taka an khingpuite an nawr zui chungin chawlhlawk hmain goal dang an thun belh thei lo naa chawlhlawk hnu lamah goal an thun leh thuai thung. Minute 52-naah Casemiro chuan goal a thun a, an si phurh a sut zo ta nge nge.
Goal hnih ve ve an thun hnuin United an khel tha chhunzawm a, inrintawkna sang zawk nen an inlan chhunzawm. United lakah point hmuh hram tuma Nottingham in tan an khawh laiin minute 67-naah Joe Worrall hnawhchhuah a ni a, dinhmun chhe zual zawkah an din phah. Tlem zawk an nih hnu in an vanduai chhunzawm a, penalty an chawi. Minute 76-naah Bruno Fernandes chuan penalty atangin hma an hruai letna goal a thun a. Captain Fernandes goal thun hmangin an mikhual Nottingham Forrest chu 3-2 in an lehthal a, point thum hlu tak an hmu.
Chelsea an chak ve ta nge nge
August 25, Zirtawp zan khan English Premier League-ah inkhel pakhat a awm a. Pathianni zanah West Ham laka tlawm Chelsea chuan Stamford Bridge-a an mikhual Luton Town chu si thum faiin an hneh a, season thara a vawi khat nan hnehna an chang.
Bazar nan sum seng nasa tak chunga beisei anga khel tha thei lo Chelsea hian Stamford Bridge-a an mikhual Luton Town lakah an khel tha ta viau a, goal pawh hma takah an thun. Minute 17-naah Raheem Sterling chuan hmahruaina goal a thun a. Sterling vek hian minute 68-naah an goal hnihna a thun zui leh a. An goal khat dang hi minute 75-naa Nicolas Jackso thun a ni.
An mualah hnehna an chan vangin Chelsea hian khelh thum atang point li hmuin pariatnaah an inhlangkai a. Championship atanga kaisang Luton Town hi khelh hnih an tlawm zawm a, table mawngphahah an awm ve thung.