Inrinni zana English Premier League khelhah Manchester United chuan si hnih faiin Old Trafford-a an mikhual Wolverhampton Wanderers chu si hnih faiin an hneh a, palina an luah nghet. Inkhel dangah pathumnaa awm mek Newcastle United in penalty chhawr tangiin tlawm an pumpelh a. European competition hmachhawn phak beiseina nung nei turin Aston Villa in Tottenham Hotspurs an hneh ve bawk.
Old Trafford ah United chak awlsam
Champions League khelh phak ngei tum Manchester United chuan Old Trafford ah 13-naa awm mek Wolves an mikhual a. An mualah awlsam pangngai taka hnehna changin palinaah an insawh nghet. Top 4 huang luah phak tuma tan khawh Tottenham an chak loh vangin United dinhmun a that phah leh zual sauh bawk. Red Devils hian pathumna ni chunga season khar tumin tan an khawh chhunzawm ang.
United hian Old Trafford-a an mikhual Wolves lakah khel tha viau mah se goal erawh an thun hma viau bik lo. Minute 32-naah Anthony Martial chuan Antony siamsak atangin hmahruaina goal a thun. Martial goal hmang hian hun rei tak chhung hma an hruai a. Goal dang an thun belh thei dawn lo emaw tih hnu hun pek belhah rawlthar duhawm Garnacho goal hmanginan chakna nemnghehin a awm. Argentina rawlthar Garnacho hian minute 90+4-ah Bruno Fernandes siamsak atangin United goal hnihna a thun a, a tawp a khar.
Wolves lakah point thum an hmuh vangin United hi top 4 huangah an insawh nghet a. Khelh 35 atanga point 66 hmuin, pathumnaa awm mek Newcastle United nen an point hmuh a inzat mek a. Pathumna ni chunga season khar turin hun tha an la nei. Inrinni zanah pathumna Newcastle in table mawngpha lama awm Leeds United an hneh zawh loh vangin United in Magpies hi lehpelh theih beiseina an nei sang leh zual bawk.
Newcastle in tlawm an pumpelh
EPL table-ah pathumnaa awm mek Newcastle United chu tlahniam thei dinhmuna ding mek Leeds United hmachhawn turin Elland Road-ah an lenglut a. Mimualah penalty vawi hnih an hmuh an chhawr tangkai a, tlawm an pumpelh hram vangin pathumna an luah chhunzawm theih phah.
Him theih beiseia tan khawh Leeds United hian an mikhual Newcastle lakah bul an tan tha a, minute 7-na lekah Luke Ayling chuan hmahruaina goal a thun. Chawlhlawk hmain goal dang thun belh theihna hun tha an nei a. Penalty an hmuh, Patrick Bamford pet chu Newcastle si nghak Nick Pope chuan a dansak a, an hun tha an hloh. NIck Pope vanga an him hlauh hnuin Leeds hian penalty an chawi ve thung. Minute 31-naah Callum Wilson chuan harsatna tawk lovin penalty a pet goal a, an si phurh a sut. Chawlhlawk hmangin goal dang a luh belh lova, 1-1 a inhnehtawk chungin chawlhlawk an hmang.
Chawlhlawk hnu lamah Newcastle an vannei zawn a, penalty an hlawhchhuak nawn leh. Minute 69-naah Callum Wilson chuan penalty a pet goal nawn leh a, hma an hruai letna goal a thun. Hnufual zawkah an tan hnuin Leeds hian an si phurh sut ngei tumin tan an khawh zui chiam a, an hlawhtlin zui ta nge nge. Minute 79-naah Rasmus Kristensenan chuan an si phur a sut. Hun tawap dawn tepah Leeds United player Firpo hnawhchhuah ni mah se Newcastle in an chhawr tangkai zo tawh lova, an Elland Road-ah point thum an hlawhchhuak zo lo.
Pathumnaa awm mek Newcastle United lakah tlawm an pumpelh vangin Leeds United hian pen khatin hma lam an pan a, 19-na atangin 18-naah chho. Team lian lakah tlawm an pumpelh vangin him theih beiseina sang zawk an nei a. Khelh hmasak pathum an la neihah him tumin thapui tak zet an thawh ang. Leeds lakah an chak zawh loh vangin pathumnaa awm mek Newcastle dinhmun a derthawng a, an hnuai chiaha awm mek United nen khelh 35 atangin point 66 ve ve an hmu.
Inrinni zana inkhel dangah Aston Villa chuan Tottenham chu 2-1 in an hneh a. European competition khelh phak beiseina sang zawk an neih phah.
United in pa 4-na an luah nghet
![](https://theaizawlpost.org/wp-content/uploads/2023/05/united.jpg)