Daily Newspaper

United in Quarter final lut

23

Nilai zan atang khan Europa League khelh chhunzawm leh a ni a, Manchester United chuan an mikhual LASK hnehin quarter final an lut a, quarter final-ah FC Copenhagen an hmachhawn zui leh ang.

United an chak chiang
Premier League club lian Manchester United hian khualmualah si nga fai ngawta an sawp tawh LASK chu Old Trafford-ah an mikhual a. Lingard leh Martial te goal thun hmangin hnehna an chang nawn leh a, si belhkhawmah 7-1 ngawta hnehna changin quarter final an inhlangkai.

Old Trafford-ah inkhelah hian khualmualah 5-0 ngawt an chak tawh vangin United hian an team tha ber an chhawr lo. Quarter final hmachhawn tura inbuatsaih in, an player tha thenkhat an hahdamtir. Old Traafford-a inkhel mah nise inkhel a hmuhnawm tawk lova, goal lut pawh a awm lawk thei lo va, 0-0 a inhnehtawk chungin chawlhlawk an hmang.

Chawlhlawk hnu lamah kikhual team in bul an tan tha a, goal thun hmasa zawkah an tang. Minute 55-naah Philipp Wiesinger chuan LASK hmahruaina goal a thun nawlh a, United an barakhaih. Goal an chhuah hian United a thawngharh chiang hle a, an insiamtha nghal thuai. Goal an chhuah atanga minute hnih hnu lekah Juan Mata siamsak atangin Jesse Lingard chuan goal thuin an si phurh a sut. Lingard hian United tan goal a thun thei lo vang vang a, EPL khar zan khan season kal meka a goal khatna leh a goal tawp ber a thun hlauh. Season tawp niah a chetha tan chauh a, Europa League-ah goal a thun zui leh a, a theihna a lantir chho leh tan.

Lingard goal thun hnu hian goal dang a luh belh thei lo vang vang a, hun tawp dawn hnaih minute 88-naah bench atanga lut Anthony Martial chuan hma an hruai letna goal a thun a, Martial goal hi an chakpui zui ta a ni. Season kal mekah Anthony Martial hi United player chetha ber a ni a, inelna hrang hrangah goal 23 thun tling tawh in, United tana goal thun hnem ber a ni.

Manchester United hian Austrian club an ngam zui zel a, an hmachhawn tawh vawi 10-ah tlawm an la nei miah lo. European Competition-ah ram khat club laka tlawm nei lo rei ber an ni.

United hmachhawn tur FC Copenhagen
Nilai zan vek khan FC Copenhagen chuan khualmualah si khata an ngam loh tawh Istanbul Basaksehi chu an mualah an mikhual a, si thum faia hnehna changin si belhkhawmah an chak let a, United hmachhawn turin quarter final an lut.

Denmark club lian FC Copenhagen hian an mualah tha takin bul an tan a, goal pawh an thun hma hle. Minute lina lekah Jonas Wind chuan hmahruaina goal a thun nghal pang. An mualah goal thun hma hle mahse goal dang erawh an thun belh thei mai bik lo. Istanbul Basaksehi hian goal thun in, khualmual goal neih nghei an tum hle a, khualmualah mar tha takin an inlan a, chawlhlawk hmain goal dang erawh a luh belh thei lo.

Second half tan a ni a, mualneitu FC Copenhagen bawkin bul an tan tha leh. Minute 53-naah penalty an hlawhchhuak a, he penalty hi goal hmahruai thuntu Wind chuan an goal hnihna a thun a belh leh. Minute 61-naah Falk Jensen chuan an goal thumna a thun belh zui leh a, an mualah si thumfai ngawta hnehna changin, si belhkhawmah 3-1 in an chak a, quarter final an lut.

Europa League quarter final atang hian knockout in khelh a ni tawh dawn a, August ni 10 hian Cologne-ah khelh a ni ang. FC Copenhagen hian khingpui hautak tak an neihzui a ngai dawn a, Premier League-a pathum a, Bruno Fernandes an neih hnua hmasawn thar tak Manchester United an hmachhawn a ngai dawn a ni.

Nilai zana inkhel dangah Shakhtar Donetsk chuan 3-0 in Wolfsburg an hneh a, si belhkhawmah 5-1 in hnehna an chang a, quarter final an lut ve bawk. Donetsk hian nizana Basel leh Eintracht Frankfurt te inkhela chak zawk zawk an hmachhawn zui leh ang.

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy