Daily Newspaper

United in Sancho la lut fel

20

Premier League club ropui Manchester United chuan hun rei tak chhung an lo hel tawh Jadon Sancho chu an la lut fel ta nge nge a. A manah £73m an seng a, a man hu pung leh thei a la ni thung.

Kum 21 mi England winger Sancho hian United zawm turin kar hmasa khan medical test a lo paltlang tawh a. Ziahfel ngai zawng zawng an ziah fel hnuin zirtawpni khan an inla lut fel ta nge nge. Kum hmasa lamah pawh United in lak tuma an lo hel reng tawh, an lak mai theih loh Sancho an la thei ta nge nge hi an tan chanchin lawmawm tak a ni ngei ang. Borussia Dortmund atanga United zawmtu Sancho chuan, “Khelhna hmun tha tak min pek avangin Dortmund chungah ka lawm tak zet a ni” tiin a club hlui lakah lawmthu a sawi a. “Engtikah emaw chuan England-ah hian ka kir leh ngei dawn tih hi ka hria a ni”, tiin Premier League hmachhawn ngei a tum thin thu a sawi tel bawk.

Rawlthar forward tha tak Sancho hian a naupang lai chuan Watford tan a khel thin a, kum 2015 khan Manchester City rawlthar team a zawm. Kum 2017 khan rawlthar tan hmun tha, rawlthar tha tak tak chherchhuak thin Borussia Dortmund a zawm. Dortmund a zawm hi a tifuh hle a, hma a sawn chak hle. Bundesliga club lian-ah hian player pawimawh a ni chho thuai a. Season thum chhung chu assist vawi 20 a nei tling zawn zat a. Goal 10 a thun tling ziah bawk. Dortmund-a kum khat a hmannaah a che tha tawk lova, vawi 21 khelin goal nga a thun a, assist vawi sarih a nei bawk. 2018-19 atangin a par vul ta tak tak thung. Hemi season hian inelna hrang hrangah vawi 43 a khel a, goal 13 thunin, assist vawi 20 a nei tling. 2019-20-ah a chetha leh zual a, vawi 44 khel in, goal 20 a thun a, assist vawi 20 a nei tling bawk. Season liam ta khan hliam in a tihbuai ve zeuh vangin a khel tam tawk lo. Inelna hrang hrangah vawi 38 a khel a, goal 16 thun in, assist vawi 20 a nei tling tho thung. Dortmund tan hian inelna hrang hrangah vawi 137 a khel tling a, goal 57 a thun tling hman.

Dortmund tan a khel that thin em vang hian England aiawh tur kum 2018 khan koh a ni. Euro 2020-ah khan player ngaihven hlawh pawl ni bawk mahse a chetha tawk lo. Final-ah penalty a thelh vangin sawisel a tawk zui hrep nghe nghe. England tan hian vawi 23 a khel tling tawh a, goal 3 a thun tawh. Euro 2020-ah a chetthat tawk loh vangin sawisel a hlawh a, a boruak hniam lai takin club ropui Manchester United a zawm fel a, a tan ni thar duhawm a inherchhuak ve leh ta nge nge.

“United ka zawm ve ta mai hi ka lawm em em a, ka suangtuah ram a thleng dik a ni. Premier League-ah United tan ngei inlan ka nghakhlel tawh tak zet a ni”, tiin United forward thar Sancho chuan Red Devils tan inlan a chak tawh zia a sawi. Sancho hi Harry Maguire dawta British player manto ber a ni. United hian Sancho hi an chhawr tangkai hle a rinawm a,an khel en a chakawm tawh hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy