Daily Newspaper

United in semi final an lut

13

Thawhtan zan khan Europa League quarter final khelh tan a ni a, Manchester United chuan Bruno Fernades goal thun hmanga hnehna changin semi final an inhlangkai.

Premier League club lian Manchester United hian Cologne-ah Demark club lian FC Copenhagen an hmachhawn a, rinkai zawk ni mahse goal thun an harsat thung. FC Copenhagen hi team lian leh ropui zawk lakah huaisen takin an inlan a, inlehthalna lian thlentir mial an tum hle. Inkhel hmuhnawm angreng takah hun pangngaiah goal lut a awm thei lova, minute 30 dang an khelh zui a ngaih phah.

United manager Ole Gunnar Solskjaer chuan chetsual khut ching David de Gea aiin Argentina si nghak Sergio Romero a thlang a, a tisual lo. Tlarhnungah Aaron Wan-Bissaka, Eric Bailly, captain Harry Maguire leh Brandon Williams te an inkawp a, Fred leh Paul Pogba te inkawp an chetha thawkhatah a ngaih theih a. Tunhnaia goal thun thei chu tlar hmaah a mal tlat a, Martial hi United harhtharna thlenpuitu Bruno Fernandes chuan a thlawp. A sira tlan Marcus Rashford leh English rawlthar zinga chetha ber pawl Mason Greenwood an hmuhnawm leh pek viau.

United hian na takin an khingpuite an nawr a, goal thun theihna hun tha pawh an nei zauh zauh. Copenhagen si nghak Karl-Johan Johnsson a chetha a, tha tak taka save neiin a team a chhanhim a tih theih. Tarhnunga inremphui tha tak Copenhagen hian minute 90 chhhungin an khingpuite an dangchat tluan thei a, penalty thlen hram a, vanneih an beisei hman hle nghe nghe a ni. United lakah tlawm in, semi final lut phak lo mahse Copenhagen goalkeeper Karl-Johan Johnsson chu a chet that em vangin ‘man of the match’ ah thlan a ni zui nghe nghe a ni.

Hun pangngai a zawh hnuin minute 30 dang an khel leh a, United an vannei ta thung. Minute 95-na lekah penalty an hlawhchhuak. He penalty hi Bruno Fernandes chuan a pet goal a, hmahruaina goal a thun. Fernandes hian si nghak Karl-Johan Johnsson chu a chetziain a bum chiang hle. Nidang ang bawkin a pet dawnah Fernandes hi zuan leh zeuh turin Johnsson hian a ngai a, United forward Fernades zuan hun a nghah laiin Fernandes hian tha zetin a pet thut a, a pet goal chiang hle. United hian season kal mekah penalty vawi 21 zet an hlawhchhuah tawh a, Europe-a league lian zual panga zinga penalty hlawhchhuak ngun ber a ni.

FC Gopenhagen hian hun tawp thlengin an si phurh a sut thei tawh lova, United lakah uitawm taka tlawmin semi final an lut zo lo. United hian European competition-ah a vawi 17 nan semi final an lut ve thung. Semi final-ah Premier League club te intum thei dinhmunah an ding a, nizana inkhel hmachhawn Wolves in Europa League a champion ngun ber Sevilla an hneh a nih chuan United leh Wolves te hi semi final-ah an inhmachhawn thei dawn a ni.

Manchester United hi champion tura rinkai an ni a, Inter Milan nen final-ah intum theihna hun tha tak an neia ngaih a ni. Tarlan tawh angin United hian Wolves leh Sevilla te inkhela chak zawk zawk an hmachhawn dawn. Inter Milan aiin an kawng a harsa hret zawka ngaih a ni a, Wolves leh Sevilla te hi team nem an ni dawn lova, khingpui hautak an tling ngei ang.Inter Milan hian Shakhtar Donetsk leh FC Basel te inkhela chak zawk zawk an hmachhawn zui ve leh thung ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy