English club lian Manchester United leh Chelsea ten manager thar neih an ngeih a, hnehna an chang zel. United leh Chelsea te hian hma lam an pan zel a, champion an beisei ngam leh tan hial tawh.
United 2-0 Tottenham
Manager lailawk Michael Carrick hnuaia khel tha tak; vawi thum chak zawn hial tawh Manchester United chuan fiahna hautak an paltlang leh a. Inrinni zan khan Old Trafford-a an mikhual Tottenham Hotspurs chu 2-0 in an hneh. Tottenham hnehtu United hian top 4 huang an luah nghet a, champions league khelh pha turin an inrintawk hle tawh.
Manager thar Carrick hnuaiah vul thar a, team lian Arsenal leh Manchester City hneh zawn thei hialtu United hian tun hnaia hneh an harsat thin Tottenham lakah bul an tan tha hran lova, an muala inkhel ni bawk mah se ball chang tlem zawk an ni a, hlauhawm pawh an siam tlem zawk. Ball chang tlem zawk ni bawk mah se chak tura Khuanu duan an ni ta mai emaw tih turin an tan tha turin thil a thleng thuai. Tottenham Captain Cristian Romero chu United midfielder Casemiro lakah hlauhawm taka chet vangin minute 29-na lekah hnawhchhuah a ni. An mualah tam zawk an nih vangin boruak a inthlakthleng thawk a, chak tur zawka ngaih chu United an ni nghal leh daih a, an chak zui ta reng bawk.
Tam zawk an nih vanga phur taka inlan United hi chawlhlawk hmain an che fuh a, short corner atangin ball an inpe kual a, Bryan Mbuemo chuan fuh ang reng takin leihrulah a pet goal a, minute 38-naah hmahruaina goal a thun. Mbeumo goal thun hmang hian United in 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal a luh belh lawk thei lo. Hun rei tak chhhung goal a luh belh theih loh hnuin United in a tawp an khar fuh a, goal an thun belh leh. United tan hian captain Bruno Fernandes chuan minute 81-naah an goal hnihna thunin, an hmahruaina a tizau. Fernandes goal thun hnuin goal dang a luh belh thei tawh lova, United chuan an mualah hnehna changin point thum hlu tak an hmu.
Tarlan tawhin manger thar Carrick hnuaiah United an vul hle a, EPL-ah vawi li lai an chak zawn ta a, top 4 huang an luah nghet. United hian hmahruaitu Arsenal chu point 12 zetin thlau bawk mah se champion cho ngam team an nihzia an lantir chiang deuh deuh zel a, an insiamtha chak hle.
Chelsea 3-1 Wovles
Manager thar Liam Rosenior hnuaia hmasawn tak Chelsea chuan table hnuai ber luahtu Wolves chu 3-1 in an hneh a, point thum hlu tak an hmuh belh leh. Blues tan hian Cole Palmer chuan hattrick a siam a, an team chu point thum a hlawhchhuahpui. Wolves goal hi Tolu Arokodare thun a ni.
United leh Chelsea te an chak zel
