Daily Newspaper

United leh City an chak

10

Inrinni zana English Premier League khelhah Man-chester khaw club pahnih United leh City te an inlan a, hnehna an chang ve ve. United in khualmualah West Ham an lehthal laiin, City chuan an mikhual Fulham chu si hnih faiin an lo hneh ve thung.

Season bul an tan that loh vanga an manager ban mai tur anga thawm nei hman United chuan khel tha ang reng tak, pangana luah mektu West Ham United an hmachhawn a. Khualmualah 3-1 a hnehna changin, table-ah hma an sawn hret.

London Club West Ham hian an mualah an khel chhe lem lo hle a, hun chanve hma lam phei chu an awpbet a tih theih. Minute 38-naah vengtu nei lo Tomas Soucek chuan tauh goal in, Hammers hmahruaina goal a thun. PSG hneh loh vanga hnual tak United hian ho lama taka goal an chhuah vangin an hnual hman hle a, an tlarhnung player te goal an chhuah danah an hawihai hle.

Chawlhlawk hnu lamah United khel a kang ta hret thung. Minute 65-naah Paul Pogba chuan Bruno Fernandes siamsak atangin hmahruaina goal a thun. Pogba goal thun hnu hian na takin an khingpuite an nawr chhunzawm nghal zat a, an khingpuite talbuai laiin goal dang an thun belh zui leh nghal zat bawk. Minute 68-naah defender Telles siamsak atangin Mason Greenwood chuan hma an hruai letna goal a thun.

Hmahruaitu zawk an nih hnuin inringtawk leh zualin United an inlan a, an khel tha zui hle. Minute 78-naah Juan Mata siamsak atangin Macus Rashford chuan an goal thumna a thun zui leh zat bawk. Si hnih ngawt an phurh hnuin West Ham chu thochhuak tur an awm zui tawh lo va, an mualah United ngam lovin an tlawm zui a, pasarihna daihah an tla thla nghal bawk. West Ham an tawlh hnun laiin United in hma an sawn ve thung a, top four huangah an luah ta chiah thung.

United hian champions league-ah khingpui hautak tak an neih zui leh nghal dawn a. Last 16 luh inchuhin German club RB Leipzig nen thawhleh zan khian an inhma-chhawn zui leh nghal ang. Khual-mualah an tlawm a nih chuan last 16 lut zo lovin an tla dawn a ni.

United ang bawka 2020-21 season-a beisei phak lo Manchester City chuan Etihad Stadium-ah table hnuai lam luah mektu Fulham an mikhual a, Raheem Sterling leh Kevin de Bruyne te goal thun hmanga hnehna changin, pangnaah an inhlangkai a, hma an sawn ve hret hret zel.
City tan hian minute ngana lekah Sterling chuan hmahruaina goal thun a. Minute 25-naah midfielder tha zet mai Kevin de Bruyne chuan an goal hnihna a thun zui leh bawk .

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy