Daily Newspaper

United leh Sancho an inrem

14

Infiamna chanchinthar tarlangtu rintlak tak pakhat BILD chuan Manchester United leh Jadon Sancho an inrem niin a tarlang.

BILD in a tarlan danin Sancho hian kum nga cham turin United hi a zawm ang a, kar khatah £340,000 zet hlawh phak in, EPL-a player hlawh hnem ber pawl a ni phak nghal der dawn. Premier League player zinga hlawh hnem ber ni mek chu Manchester United si nghak David de Gea a ni a, kar khatah £375,000 zet a hlawh. De Gea hian tihsual khut a hrat vangin a hma lam hun a chiang lo mek thung. EPL player zinga hlawh hnem ber dawttu chu Arsenal in an chhawr rim tawh loh Mesut Ozil a ni a, kar khatah £350,000 zel a hlawh. Sancho hian United a zawm fel a nih chuan EPL player zinga hlawh hnem pathumna ani nghal der dawn a, England leh Manchester City tana khel tha thei tak Raheem Sterling aiin £40,000 zetin a hlawh hnem nghal der dawn a ni.

German club lian Borussia Dortmund chuan kum 2017 khan Manchester City atangin Jadon Sancho hi £8m sengin an la lut. United hnenah hian £108m in an hralhchhuak dawn niin tarlan a ni. Kum thum dawn an kawl hnuah £100m zet hlepin hralhchhuah dawn mahse Dormund hian £108m hi Sancho manah tlawm an la ti mah mah a, indawrna a kal zel thung. Report thenkhata a lan danin United hian Sancho man hi an pe tlak nghal dawn lova, tum thum pekah an tlak dawn. Thawhkhatnaah £63m an pechhuak phawt ang a, a thawh hnihnaah £27m an pek leh hnuin a tawp nan £18m an pe leh dawn.

United hian £108m senga Sancho an la lut thei a nih chuan Premier League player manto ber a ni dawn. United vek hian kum 2016 khan Juventus atangin Paul Pogba chu £89m sengin an la lut a, hei hi English topflight club in player an lei to ber a ni rih. England rawlthar duhawm Sancho hian United a zawm a nih chuan EPL record a siam bakah a hlawh sang nghal hle dawn a ni.

Kum 20 mi Sancho hian kum 2022 thleng Dortmund-ah hian contract a la nei a, kar khatah £190,000 zel a hlawh mek a, United a zawm a nih chuan a hlawh hi £150,000 zetin a pung dawn a ni. United manager Ole Gunnar Solskjaer chuan Liverpool leh Manchester City te nen an inkar tizim turin Sancho hi lak luh a tum No 1-ah a dah a, a tum a hlawhtling thei dawn niin a ngaih theih tan.

Rawlthar tha ber pawl Jadon Sancho hian Borussia Dortmund tan vawi 78 a khel tawh a, goal 30 a thun tling tawh. Season kal mekah hian inelna hrang hrangah Dortmund tan hian goal 20 a thun bakah assist vawi 19 zet a nei tling bawk.

The Aizawk Post

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy