United States-in bei chhunzawm zel dawn

White House chuan Iraq leh Syria-a Iran thlawp militia te laka airstrike a kalpui chu ‘a tawpna ni lovin, a bultanna chauh a ni’ tiin a sawi.
National security adviser Jake Sullivan chuan US media-te hnenah ‘Nasa zawkin hmalakna kalpui a ni ang’ tiin a sawi zui a.
US chuan kar kalta lawka Jordan-a a sipai pathum nunna chan phahna chhana phuba lakna chu a la kalpui zui ta zel a ni.
Iran chuan inhnamhnawihna a nei lo a inti chungin Iran thlawp Islamic Resistance-in Iraq te chuan Jordan-a US base beihna chu an tih a nih thu an sawi thung.
US chuan Tehran chu mawhphurtu zingah telhin Jordan-a a base beih nana militia tena an hman chu Iran siam drone a ni a ti hmak thung.
President Joe Biden chuan Pathianni khan Congress hnena lehkha a thawnah Iran armed forces – Islamic Revolutionary Guard Corps (IRGC) leh militia group te IRGC nena inzawmna nei te hmun chu beih a ni tiin a sawi a.
IRGC te chu Islamic Resistance in Iraq te ralthuam leh sum mai bakah training te petu a ngaih an ni.
Biden chuan ‘command and control, weapons storage, training, logistics support leh thil pawimawh dang te’ chu airstrike hmanga an beihte chu an ni tiin a sawi bawk.
He chetlakna hi heng group tena chetlak zuina an neih theihna tur tihtawpna tur tia sawi bawkin civilian tena an tawrhloh theihna ber tur leh buaina nasa zawk a punlun loh theih dan tur ang bera kalpui tiin a sawi bawk.
Chu mai bakah IRGC leh IRGC hnuaia inziaklut te lakah nasa zawka hmalakna kalpui a ni ang tiin Biden chuan a sawi bawk.
Kar kalta Zirtawpni khan US chuan Iraq leh Syria a militia te hmun pawimawh chu a beih hnuah Inrinni khan UK nen Yemen a Houthi te hmun 36 an bei zui bawk a.
Hei hi Houthi militants tena Red Sea a shipping vessel te bei renga harsatna nasa tak siama shipping company lian tena an kal ngam loh phahna hrin a ni.
Egypt chuan Houthi te chetlakna avang hian Suez Canal paltlang atanga revenue a hmuh thin chu a zah ve lawihin a tlahniam tiin a sawi a, Houthi tena lawng an beih thin avang hian kal ngam an tlem hle a ni.
Houthi te erawh chuan US beihna chuan a tizuai dawn lo tia sawiin Pathianni khan Houthi thupuangtu Yahya Sarea chuan, “Heng min beihna te hian kan rilru, sakhuana leh Gaza Strip a Palestinian mite kan thlawpna a tizuai dawn lo va, kan chhanglet zel bawk ang,” tiin a sawi.
America-in a beihletna chuan helai region-ah sel hlawhin Iraqi leh Syrian sorkar te pawhin an dem thu an sawi a.
“US-in airstrike a kalpui tur hi hrilh hriat kan ni lo,” tiin Farhad Alaaldin, Iraqi prime minister adviser chuan a sawi a. “Hrilh lawk kan ni emaw ni lo emaw a danglamna a awm lo Iraq hi sovereign state a ni,” tiin a sawi bawk.
US air strike avang hian pro-Tehran militia member 17-in nunna an chan sun turin Baghdad-ah mipui an pungkhawm bawk a. Chung mi te chuan ‘America hi sual turu ber a ni’ tiin an aurual bawk.
Oman foreign minister pawhin helai region vela buaina awm chu an ngaimawh takzet tiin a sawi bawk a. Badr Albusaidi chuan US chetlak dan chuan helai region himna, ngelnghehna leh tharumthawhna leh firfiakna laka hmalakna a tizuai thei zawk tiin a sawi.
Washington thung chuan airstrike chuan nasa takin militia te theihna a tihniam nghal tiin a sawi ve thung.
Sullivan chuan US chuan Middle East ah military campaign kalpui a tum hauh lo va, mahse heng harsatna siamtu group te bei let tur chuan a inkau reng, a ti bawk a.
US Secretary of State Blinken chuan Middle East region tlawh zui nghal danwin Israel, Egypt, Qatar, Saudi Arabia leh West Bank te a tlawh dawn a.
Blinken chuan Hamas tena Israeli khua leh tui an hren te chhuah zalen chu a nawr tur thu sawiin a ngaih pawimawh ber a nih thu a sawi a. Kan nawr ang a, mahse, Hamas te kutah thil a innghat tiin a sawi thung.
US chuan Yemen-a Houthi te chu missile hmangin a sai zui leh nghal zat niin US Central Command (Centcom) chuan a tarlang a.
Centcom te chuan US forces chuan land-attack cruise missile leh anti-ship missile pali lai Red Sea a lawng te beih nana hman tum chu a tichhia tiin a tarlang.
Houthi tena Red Sea a lawng an beih thin avang hian khawvel sumdawnnain a tuar hle tawh a. Lawng lian bungrua phurte chuan Red Sea paltlang ngam lovin a kual zawngin South Africa-ah Cape of Good Hope lamah an kual ta thin a. Chu chuan bungrua phurh man te ti to hlein consumer ten an tawrh phah zui a ni.
Houthi te chuan Red Sea a lawng an beih te chu Israel leh US lawng tiin an sawi a, Gaza Strip a Israel leh Hamas te indona kal zelah Palestinian te an tawrhpuina leh Israel chet dan an duhlohna lantirna tiin an sawi.