Daily Newspaper

United tan fiahna hnuhnung

10

Zanin dar 11:25 atangin UEFA Champions League group match hnuhnung ber khelh tan a ni dawn. Thih leh dam kara leng Premier League club lian Manchester United chuan khualmualah fiahna hautak an hmachhawn dawn a, RB Leipzig nen last 16 luh an inchuh dawn. Group harsa group H leh F te inching fel tur hi a ngaihnawm hle ngei dawn.

Group match-a intum tur pawh fel a nih tirh khan group H hi group harsa ber tura ngaih a ni nghal a, PSG, United leh RB Leipzig te an awm tlang thua. Anni team lian pathum hian point kua theuh an hmu a, tla thei leh tling thei vek an ni a, zanin hian an inching fel dawn.

Season liam taa finalist PSG hian an group atanga tlachiang hmasa ber Istanbul Basaksehir an mikhual dawn a, last 19 luh theihna hun nei tha bera ngaih an ni. An khelmualah ngei table mawngphah an hneh a nih chuan group champion an ni dawn a. An mikhual hneh lova an tlawm khut a nih a, United leh RB Leipzig te an inhnehtawk a nih si chuan PSG hi last 16 lut zo lovin an tla hang nalh ve thei tho thung. Tla hang nalh thei an nih vangin an tan inthlahdah a thiang dawn lova, an mikhual Istanbul Basaksehir hneh tumin thapui an chhuah ngei ang.

RB Leigzig in United an mikhual tur hi inkhel ngaihven hlawh ber tura ngaih a ni. Old Trafford-a an inhma-chhawn tumin Uni-ted hian singa fai ngawtin hnehna an chang. Old Trafford-a an sawp tawh an nih vangin khual-mualah pawh hneh nawn leh turin inrin-tawkna sang tak an nei ngei dawn a. Chutihlai chuan German club RB Leipzig hian khualmuala an tlawm tawhna thung-ruluin, United hi hneh let ngei an tumruh hle thung ang. Inrinni zan khan Champions League champion Bayern Munich chu khualmualah 3-3 in an inhnehtawkpui a, he result hian inrintawkna sang zawk a pe ngei ang. United hian inrinni zan khan khualmualah West Ham an hneh ve bawk am khualmuala chetha thin an nih vangin Germany-ah point thum hlawhchhuak turin an inringtawk hle ang. RB Leipzig leh United hi zanlai dar 1:30-ah an inhmachhawn dawn a, en ngei chi a ni ang.

Thawhleh zana inkhel tur zingah Group E-ah G te an inchingfel tawh a, Group E-ah Chelsea chu group champion an ni a, Sevilla nen last 16 an lut chiang tawh. Group G-ah Barcelona chu group champion ni in, Juventus pahnihna an ni a, an pahnih hian last 16 an lut tawh bawk. Anni group hnih hi chuan ngaihven an hlawh tawh vak dawn lo va, ngaihven hlawh tur chu group F a ni leh ang.

Group F-ah hian Borussia Dortmund in last 16 an lut chiang tawh a, group champion tur a la chiang lo thung. Last 16 lut thei dinhmuna ding ve ve Lazio leh Club Brugge te an inhmachhawn dawn a, inkhel pawimawh tak a ni ngei dawn. Serie A club Lazio hian point 9 an hmu mek a, last 16 lut turin an muala point khat hmuh a tawk. An mualah an tlawm a nih erawh chuan point 7 hmu a, pathumna luah mektu Club Brugge chuan last 16 an lut daih ve thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy