UNSC in Gaza-ah inkahhai tur ti

UN Security Council chuan Gaza ah inkahhai tur a ti ta a, US chuan a dinna thlakin resolution a veto duh tak loh avangin a tlang ta a ni.
Nikum October thlaa Gaza indona chhuah hnuah a tum khat nan UN security council chuan inkahhai tur a ti ta chauh a. Hei mai bakah hian lung in tang te chhuah zalen turin a ti nghal bawk.
US in a veto duh loh avang hian Gaza buaina chungchangah US leh Israel te inkarah ngaihdan inang lo a awm tia ngaih a ni a.
Israeli Prime Minister Benjamin Netanyahu office chuan thuchhuah natak siamin US chuan a dinna ‘a bansan’ tia sawiin a hma chuan inkahhai chu Israeli rukbote chhuah zalen vek nen inkaihhnawih tlata a ngaih a ni a ti a. “Pawi tak maiin US chuan a veto lo” tiin tarlan a ni.
Thuchhuah siam chuan Israeli rukbo te chhanchhuah an nih theih nana hmalakna tihthuanawpa awmin Hamas-te chuan Israeli mitang an kawlte chhuah hauh si lovin international pressure hmangin inkahhai an thlentir thei a ni a ti bawk.
Netanyahu chuan Israeli delegation leh US official tena tunkara Washington a inbiakna neih an tum pawh a thulh tir nghal bawk.
Israel defence minister chuan Israel chuan mi tangte chhuah zalen an nih hma chuan Gaza-a indona chu an chawlhsan dawn chuang lo a ti zui bawk.
UN a Palestinian aiawh Riyad Mansour erawh chuan UN resolution chu lawmawm a tih thu a sawi a. “Thlaruk hnuah Palestinian 100,000 chuang tihhlum an nih hnuah leh maktaduai hnih chuangin in leh lo chhuahsanin tam a tlak hnuah he council hian inkahhai a ngiat ta chauh a ni” tiin Mansour chuan a sawi.
Gaza-a rorel Palestinian militant Hamas-te 7 October, 2023 a Israel beia mitang sangkhat chuang latute pawhin resolution chu lawmawm an tih thu sawiin lung in tang inthleng tawn a nih theih nan hmalak an inpeih reng an ti.
Inkahhai a awm theih nana Security Council a vote lakah US chu a hai a, member 14 dang te chuan inkahhai thlawp zawngin vote an thlak a ni.
US chuan a hma zawng chuan inkahhai a awm theih nana resolution te a hnawl char char a. Kar kalta Ningani khan inkahhai a awm theih nan resolution a pulut a, mahse, chu chu China leh Russia ten an veto thung.
US National Security Council thupuangtu John Kirby chuan US in resolution kaltlangpui a remtih chuan ‘kan policy kan thlak ta tihna a ni lo’ tiin a sawi a. US chuan inkahhai awm se a ti a, mahse resolution chu a thlawp chuang lo a chhan chu Hamas-te demna tarlan a nih loh vang a ni a ti.
Kirby chuan, “Mitang te chhanchhuah an nih theih nana inkahhai siam kawngah kan dinnaah kan chiang hle a ni” tiin a sawi bawk.
UN Secretary General Antonio Guterres chuan resolution chu ‘kalpui ngei tur’ tia sawiin inkahhai mai bakah ‘mitang tinte thu dehkilh awm lovin chhuah zalen tur’ tiin a sawi bawk.
Tihian UN resolution avangin Israel chu Muslim holy month Ramadan ni 15 la awm chhung chu military campaign titawp tura tihluih a ni tiin Mark Lyall-Grant, UN a UK ambassador hlui chuan a sawi a.
UN resolution chu Israel tan dan anga zawm ngei ngai a ni a, mahse, Hamas te tan chuan a ni ve lo a chhan chu Palestinian group te chu state an ni ve lo tiin a sawi bawk.
A hma zawng chuan inkahhai a awm theih nana hmalakna te US in a veto zel a. Mahse, tun hnaiah Gaza a civilian nunna chan tam lutukah US chu a fimkhur zual ta nia sawi a ni a. Gaza ah hian Israel in a run hnuah nunna chan 32,000 chuang an awm tawh niin Hamas enkawl health minsitry chuan a tarlang.
US chuan Israel chu Gaza ah tanpuina tam zawk thawnluh remti turin a tur bawk a.
United Nations chuan Israel chu tanpuina dangchatah a puh bawk a. Israel thung chuan UN chu tanpuina semzai thei lovah a puh ve thung a, tanpuina te Hamas-te kuta lut zelah a sawi ve thung.