Daily Newspaper

UPATE FINNA THURUK

24

Tharbawihi Colney

Naupan laia naupang â ber, min hmangaihtu ten fin chiah a hmabak min tih thin, mipa sual hrat tak, chhungten ka puitlin hun an nghahhlelh em em, sawi âwm leh âwm lo hre loa mahni ka tawk tawk phul liampui mai mai, mi huat thu sawi hlauh nachang hre lo leka ka lo kawlhawk chem barh ve nawk nawk hun kha a liam a.

Kum 15 ka ni ve ta reng mai a, khatih lai khan engkim hre tawhin ka inhria a, ka taksa a puitling a, than thite neiin nau ka pai thei ve tawh a, nu ka ni thei tawh tiin puitling ka inti em em a. Puitling hriat ang leh an tih theih ang chu ti ve thei vek tawhin ka inhre bawk a, fing tawh leh engkim hre vek tawhin ka inhria a ni.

Kum 20 ka chuangkai leh a, mihring nuna pawimawh ber pasal leh fa ka nei a, ropui em emin ka inhria a, Khawchhak sumdawng pawhin min pi laih laih tawh a, chhungkaw nu ber leh, rorel thei chin niin ka inhre bawk a; famkim hliah hliah hian ka inhria a, nuam tak a ni. Kum 15 ka nih lai khan fing ve viau tawh leh puitling hle tawh khan ka lo inhria a, mahse, ka lo atzia kha aw!

Kum 30 ka chuangkai leh a, fa pawh kan duh chin ang neiin nu ka ni ta hliah hliah a, sunde sikul hming lamah pawh ‘pi’ niin chawhmeh zuar leh mikhual pawhin min pi ve ta a. Ka fate nu niin A nu tia koh ka ni ta bawk a, ka va lawm thin tak em! Chhungkaw nu ber nih kha ka tlin khan ka inhre khawp a, mi nu kha kan ngai bik lo. Hetih lai hian kum 20, ka nih lai khan ka fing famkim hle tawh emaw ka ti kha a nia, ka lo atzia kha ka hre chhuak zel a.

Kum 40 chu kar loah ka ni leh ta. Upa tawh hlein ka inhria a, ka ngaihtuahna pawh fim ve hlein ka inhre bawk. Thil sawi awm chin pawh ka hriain sawi loha zep ral tur chin pawh ka hre ve tawh a, puitling an tih hi ka ni fai vek tawhin ka inhria a. Chhungkaw rorelah leh kohhran committee peng hrang hrangah pawh ka tel ve tawh a, ka puitling tak zetin ka inhria a ni; kum 30 ka nih lai khan engkim hriain, engkim ka dai tlin vek emaw ka lo inti kha a ni a, mahse, eng ruai ka lo la ni lo a, ka lo atzia kha ka hmu thar uai uai mai zawk a ni.

Kum 50 ka chuangkai leh ta! Puitlingah pawh hmanlai hun ang nise pitara ngaih theih ka ni ve ta reng mai. Puitling tak tak, khawvel nun tam tak lo hre tawh niin, tar atin min chhunzawm loin ka hre bawk a, keimahah chuan finna vawrtawp ka nei niin ka inhria. Lung erawh a leng tan ta raih mai thung a. Khawhar rukna sawi fiah thiam si lohin min luh ngut ngut chang a awm a, hma lam hun thlir aiin naupan lai nun leh nulat lai nunte chhui kirin ngaih loh lai reng hi a awm lo a, engkim mai khan ka lung min len a ni ber. Mual liam tawhte leh Van lam ngaih changte ka nei bawk a, nun a kûl deuh ruih mai a ni. |awng liam mai maite ka duh ta lo a, ngun taka thil ngaihtuah chet chet ka ching tan a, ka nun hi a chawhnu her hluah hluah hian ka inhre bawk a. Hetih lai hian kum 40 ka nih lai khan fing ve tawh viauin ka inhria kha a nia, mahse, ka lo la famkim lo hle tih erawh ka hre thar zel a.

Ka hma lam hunah engtin nge ka awm zel dawn tih chu ka hre lo; mahse, hei hi chu ka hria a. Ka hriatna lo famkim lohzia te, fing nia ka lo inhre ve te, famkim riaua ka lo inhriate kha, tun hnua ka chhui let hian ka zak chem chem a, upate an lo zahawmzia chu ka zir chhuah a ni ta a ni.

Aw le, ka sawi tum tak chu, Social media kan khawih a, naupang tê têin aia upa zah nachang hre lo lekin an hnial a, fing ber leh thil hre berah an inngai a, an aia upa an nih leh nih loh an thlu hek lo. Chuvangin hei hi hria ila, Upa thu nge nge hi a lo pawmawmin a lo fing a, a rintlak zawk a ni tih hi hria ila, an theihnghilh zat pawh kan hre lo tih hriain an zâi ngai ila, an thu hla hi i ngai pawimawh theuh ang u. Upate hi finah engtikah mah kan lehkhalh dawn si lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy