UPSC chuan kum tinin candidate tena cerfiticate sang tam tak an thehluhte enfiah vek tura mawhphurhna nei an ni lo tia sawiin mahse thuneitu hrang hrangte chuan certificate a dik leh dik loh enfiah chu an hna a ni, a ti.
Puja Khedkar case chungchangah UPSC chuan kum 2009 atanga 2023 inkar chhunga candidate 15,000 te data enfiahna a neihah Puja Manorama Dilip Khedkar tih chauh lo chuan SCE Rules hnuaia exam hmachhawn phal chin bak bawh pelh an awm lo, a ti bawk.
Khedkar bikah chuan a hming mai ni lo a nu leh pate hming thlenga a thlak kual avangin tum engzah nge exam a hmachhawn hriat mai theih a ni lo, an ti bawk a.
UPSC chuan UPSC exam Standard Operating Procedure (SOP) chu Khedkar case ang a awm zui tawh loh nan tihkhauh zual an tum tiin Commission thuchhuah chuan a tarlang bawk.
UPSC chairperson thar
Union Health Secretary hlui Preeti Sudan chu August 1 atangin Chairperson of the Union Public Service Commission (UPSC) a ni dawn ta.
Sudan hi tunah Commission member ni mek niin ‘mimal thil’ chhuanlama bang ta Manoj Soni a thlak dawn a ni.
Soni kha kum 2029 a chawl chauh tur a nih laiin kum nga dawn hun a la nei chungin a bang a. Kum 2017 khan Commission member niin May 16, 2023 khan Chairperson-a ruat a ni.
Soni ban lai vel hian fake certificate hmanga UPSC candidate-in hna a neih lai boruak vel niin mahse Puja Khedkar case kaihhnawih avanga bang ni lo tia sawi a ni thung.
UPSC hi Article 315-323 Part XIV Chapter II of the Constitution of India hnuaiah constitutional body a ni a. Union government aiawhin Commission chuan examination hrang hrang a huaihawt thin a ni.