Daily Newspaper

UR LAWK ZAN

9

-PC Thangzikpuia

Krismas ‘ur làwk zan’ kan lo hnaih leh ta hle a, social media leh chanchinbu thenkhatah te chuan ‘urlàwk zan’ tia rawn ziak an awm leh ngeiin a rinawm. Chuvangin, transitive verb thumal ‘ur’ hi amah qualify-tu adverb thumal ‘lâwk’ nen hian ziah zawm tur a nih loh dan hi grammar atanga kan lo bih chian ve leh lawk a ngâi niin a lang.

Transitive verb thumal atâna kan hman, “Vut ka lâwk,” tih ang chi-a ‘lâwk’ ni lo, ‘lâwk’ thumal dang kan neih hi chu verb sawi fiahtu ‘adverb’ a nih avangin suffix anga chei bàwl chi a ni ngai lo a; verb thumal hrang hrang kha rawn qualify-in, ‘be lâwk, chhùm lâwk, en lâwk, hre lâwk, khawngaih lâwk, lunglêng lâwk, ning lâwk, ring lâwk, siam lâwk, thlir lâwk, ui lâwk, vei lâwk, zam lâwk…adt.’ te kan ti thin a. Hengah hian ‘lâwk’ hìan verb thil tih kan sawi hi a hun a thlen tik atâna lo ruamhman hmasak te, lo inpuahchah dim diam te, lo tih hmasak phawt ang chi te…adt. a nih thu sawi fiahin a rawn qualify ta diat diat a. Hengah hian verb thumal leh a qualify-tu adverb thumal ‘lâwk’ hi ziah zawma thumala chher daih chi a ni ngai lo a; verb leh adverb an nih anga ziah hran hian a dik zel thin a ni.

Chuvangin, ‘ur’ pawh hi verb thumal niin, adverb ‘lâwk’ hìan a qualify ve ta thin a. A awmze ngialngan anga kan hmannaah chuan zan lama pian cham lawmnaa cake ei tur te pawh chhûn lamah kan lo ‘ur lâwk’ thei ta a. Hetah pawh hian adverb ‘lâwk’ hìan verb thumal ‘ur’ hi rawn quaify-in, thil tih kan sawi hi zan lama mi tur lo puahchah leh lo siam sa ang chi sawina a nih thu a rawn sawi fiah ta a. Hengah hian verb thumal ‘ur’ leh a rawn qualify-tu adverb ‘lâwk’ hi ziah zawma ‘urlâwk’ tia thumala chher chi a ni lo leh ta a; verb leh adverb an nih anga ‘ur lâwk’ tia a inzawm lova ziah mai hi a nih dan tur a ni leh ta a ni.

Tichuan, kan thil sawi leh kan tawngkam azirin verb thumal ‘ur’ hi kawh dang neiin kan chelek ta thin bawk a. Kan hla hlui lamah pawh, “Kûtpui kan ur, khuang-ruah chiar nghian e, chappui rawh lohin a tul a ngai lo,” tih te a awm a, kan pi leh pute khân ‘kûtpui’ pawh an lo ‘ur’ thin tihna a nih chu. Chu chu ‘kûtpui’ an hman tur kha nasa taka an ruahman thu leh an lo inpuahchah thu an sawina ang chi tawngkam a ni àwm e. Hetiang bawk hian Krista pian cham ‘Krismas’ lo thleng tur pawh hi kan ‘ur’ ve thin bawk a, Krismas hmâ (December 24) zan phei chu a tûk Krismas lo thleng tur kan lo ‘ur làwk zan’ a nih thin avangin ‘ur làwk zan’ tiin kan sawi ta thin a ni.

Chhûn lama cake ei tur kha zan lamah kan lo ‘ur lâwk’ thei a, chutiang bawkin Krismas lo thleng tur pawh a hmâ zanah kan lo ‘ur lâwk’ ve thin bawk a. Hengah hian ‘ur’ hi kan thil sawi leh kan tawngkam azirin an awmzia inang diak diak lo mah sela, adverb ‘lâwk’ hìan thil tih kan sawi hi a hmâa lo ruahman leh lo inpuahchah hmasak te, lo tih hmasak ang chi te a nih thu a rawn sawi fiah ve ve ta zel a. Chuvangin, ‘ur lâwk’ tihah hian thil tih sawina verb ‘ur’ leh a sawi fiah (qualify)-tu adverb ‘lâwk’ hi ziah zawm loh hian Mizo tawng grammar kal phungah a dik ta zel a ni.

Verb thumal hi gerund atâna kan hmannaah chuan a ziah dan (sipel) thlâk danglam thin chu a ziah dan tih danglam thin niin, a rik dan thlâk danglam thin chu a rik dan tih danglam thin a ni a. Chutiangah chuan transitive verb thumal chuan amah ti fiah kimchangtu (complement) atân amâ object a chhawm thei thin a. Tichuan, “Naktûka ei tur chhang kan ur lâwk,” tia kan sawina leh, “Krismas lo thleng tur kan ur lâwk,” tia kan sawinaa verb leh adverb ‘ur lâwk’ tih hi gerund phrase atâna kan hmannaah chuan transitive verb ‘ur’ leh adverb ‘lâwk’ hi a rik dan ti danglamin, ri hniam kunin kan lam ri ta a. Tichuan, kan ‘zan’ sawi kha eng ‘zan’ nge tih sawi fiahtu atâna gerund phrase ‘ur lawk’ hi kan hman chuan, ‘ur làwk zan’ tih a lo ni ta a ni.

He ‘ur làwk zan’ tihah hian gerund atâna kan hman ‘ur’ hi transitive verb a nih avangin, amah ti fiah kimchangtu (complement) atân object a chhawm thei ta a. A object nena kan sawi kimchannaah chuan ‘Cake ur làwk zan’ tiin leh ‘Krismas ur làwk zan’ tih a lo ta mai a. Hengah hian kan thil ur làwk ‘Krismas’ hi sawi ri tel kher lo pawhin, ‘ur làwk zan’ tiin kan sawi ta mai thin bawk a ni.

Tichuan, Krismas tak tak lo thlen hmain Krismas hi kan lo ‘hmang lâwk’ thei a, kan lo ‘chen lâwk’ vel thei a, kan lo ‘ur lâwk’ thei tihna a ni ta a. Hengah hian verb leh adverb hi ‘hmanglâwk, chenlâwk, urlâwk’ tia ziah zawma thumal atâna chher chi hi a ni ngai lo a; verb leh adverb an nih anga ziah hran tur hi niin, gerund phrase an nihnaah pawh ‘ur làwk zan, Krismas ur làwk zan’ tia ziah hi Mizo tawng grammar kal phung dik chu a ni ta thlap a ni.

Kumin Krismas lo thleng tur erawh chhingkhual hripui lêng hràn vangin kan ‘ur lâwk’ hlei thei hlawm dâwn lo niin a lang a. Kum danga len khâwmna ina khuangpui leh khuangte chum chilh kâra hlim zâi thâwm lo fâwn thin te pawh kha hriat tur a awm dâwn ta lo niin a lang bawk a; biak in tual vela hâr mei khu chil chel thin te pawh kha a dai zo dâwn ta niin a lang.

Eng le khaw le! ‘Lungrual taka hlim zâi vàwr’ a rem ta ngang lo a nih pawhin, he Chhandamtu pian chamah hian ‘lungngaihna puan ang hlih’ erawh i tum theuh ang u.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy