Daily Newspaper

US a Covid-19 vaccine test hmasak ber hlawhtling viau

33

Biotech firm Moderna Inc te chuan Covid-19 vaccine an siam enchhinna an neihah a him tih finfiah niin volunteer 45 te lakah immune a tihchak thu finfiah a nih thu US researcher te chuan an sawi.

Volunteer te he vaccine dose hnih late chuan virus that thei antibodies Covid-19 kaia damchhuak leh te antibodies neih aia tam zawk an nei niin New England Journalof Medicine chuan a tarlang.

Volunteer-te zingah side effect nei nasa an awm lo va, a zahve aia tam hret te chuan – chau, lu nâ, awm nuam lo deuh, tha nâ deuh leh injection naa nâ deuh an sawi thung. Hei hi vaccine pek nawn lehnaah leh dose sang ber laah te a awm bik niin an sawi bawk.

Mithiamte chuan coronavirus pandemic leng meka khawvel puma mihring nunna 5,75,000 la tawhtu tihtawp nan chuan vaccine ngai ngeiah an ngai a ni.

Moderna te hi novel coronavirus vaccine mihringa enchhina hmasa ber niin March 16 khan genetic sequence tlangzarh a nih hnu ni 66 ah an enchhin tan tawh a ni.

Moderna vaccine siamtu researcher te hotu Dr. Anthony Fauci, director of the National Institute of Allergy and Infectious Diseases chuan ‘chanchin lawmawm’ tia sawiin vaccine chuan nghawng chhia leh hlauhawm a siam lo va, virus that thei sang tak leh antibodies neutralise thei a ni tiin a sawi.

“I vaccine-in natural infection nena khaikhina chhanletna a pek tawk theih chuan chu chu a tha tihna a ni mai” tia sawiin Dr. Fauci chuan, “Hei vang hian a nia he vaccine chungchanga kan lawm em em na ni,” tiin a sawi bawk.

Moderna shares chu stock market trading-ah a hlutna 15% in a sang zui nghal bawk.

US sorkar chuan Moderna vaccine hi thlawpin dollar billion zahve a lo pe tawh a, mihringa tam tham taka enchhinna kalpui hmasa ber an ni bawk a. A hlawhtling tak tak a nih chuan Cambridge, Massachusetts a inbun Moderna te licensed product la nei ngai lo te tan chuan hlawhtlinna turu tak a ni dawn a ni.

Eng tiangin nge a thawh?
Moderna vaccine mRNA-1273 hian ribonucleic acid (RNA)- chemical messenger protein siam thei a keng tel a. Mihringah injection luh a nihin vaccine chuan cell te chu coronavirus pawn lam tihdan zira protein siam turin a ti thei a, chu chu taksain foreign invader-ah ngaiin immune chhanletna a lo pe ta vat thin a ni.

Vaccine enchhinna result tihchuahah vaccine tum thum peka enchhin niin mi 15 kum 18-55 inkar te chu vaccine tum hnih ni 28 danah pek an ni a. Heng group te hi vaccine 25,100 or 250 micrograms pek an ni.

Vaccine tum hnih peknaah 25 microgram pek zinga volunteer 13 atanga pasarih te, 100 microgram pek 15 te leh 250 microgram pek 14 te lakah side-effect a lang a. Vaccine pek san ber te zinga pathumte chuan khawsik, lu na leh luakchhuak an nei a, an vaiin khawsik 103.28 Fahrenheit (39.6 C) an nei vek a ni.

“A nghawng chhe na lutuk engmah hmuh an nei lo” tiin lead author Dr. Lisa Jackson, Kaiser Permanente Washington health Research Institute, Seatle chuan a sawi a, damdawi In luh ngai emaw nunna chan phah an awm loh thu a sawi.

June thla khan moderna te chuan 100-microgram dose chu a nghawng chhia tihnep nan zirchian belh tura an thlan thu an lo sawi tawh a.

100 microgram dose hi Moderna chuan kum khatah maktaduai 500 an siam chhuah hman theih beiseiin tld khat thleng pawhin kum 2021 atangin an siamchhuah theih an inbeisei a, Swiss damdawi siam Lonza te nena thawkho an ni bawk.

“Hmalakna pawimawh tak a ni” tiin Dr. William Schaffner, vaccine expert, Vanderbilt University Medical Centre a thawk leh he damdawi enchhinnaa inhnamhnawih lo chuan a sawi a.

April thla khan Moderna chuan Phase 1 trial lo nei tawhin puitling kum 55 pel tawh te virus avanga dinhmun derthawng zawka awm te lakah a lo kalpui tawh a. Moderna chuan side effect awm theite an zirchian zui tur thu leh immunity daihrei theih chhung te nena an zirchian zawm tur thu an sawi bawk.

Moderna te hian Phase 2 trial May thla khan neiin Phase 3 trial chu July 27 ah neih hman an tum bawk.

Phase 1 trial ah hian a him leh him leh leh vaccine pek tur tawk chin enchhinna kalpui thin a ni a. Phase 2 trial-ah chuan mihring tam zawkah enchhinna lian tham zawka kalpuiin a that leh thatloh enfiah leh a ni a. Phase 3 trial-ah chuan mi hrang hrang lakah a that dan chiah leh side effect tha lo zual bik a nei em tih enfiah thin a ni a. Moderna chuan Phase 3 trial-ah hian volunteer 30,000 an hman tur thu an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy