Covid-19 in khawvel ram a tihbuai atanga kum-2 hnu pawhin US-a zin tumte tan visa hmuh a la harsa hle a, US sorkar pawhin kum tluanin theih tawp chhuah mah se dinhmun pangngaiah a la dah thei rih lo a ni. Tun dinhmunah chuan India atanga B1/B2 visa hmuh tumte hian ni 500 vel an nghah a ngai a ni. US Department of State-Bureau of Consular Affairs website atanga data thar ber tarlan danin visa nghah hun chhung te chu –
New Delhi – 542 Calender Days
Kolkata – 539 Calendar Days
Mumbai – 596 Calendar Days
Chennai – 531 Calendar Days
Hyderabad – 511 Calendar days.
Heng visa nghah hun chhung tarlan te hi interview hmachhawn ve thei lo turte tan an ni a. Pem lo turte tana US embassy or consulate-a visa nghah chhung leh interview nghah hun chhung hi an hnathawh ang zel leh staff an nihna ang zelin kar tin a danglam ve thei a ni. B1 visa neitute hi sumdawnna lam thila US zin turte an ni a, B2 visa neitute hi khualzin pangngai niin thian leh chhungte tlawh tur te, damdawi lama inenkawl tur te emaw khawtlang thila intihhlim tum te an ni. A tlangpuiin B1/B2 hmanga khualzin te hi a chunga thil pahnih hmang te bakah hunawl hnawhkhah nana US tlawh tumte an ni. Visa diltu kum 14 aia naupang emaw kum 80 aia upa emaw te chuan India-a Embassy/Consulate atangin interview an ngai ve lo a ni. Heng ho chuan visa dilna chu a buaipuitute hnen atangin an dilna an thehlut thei reng a ni. Zin veivak mi an visa te lo pawm tawh emaw department thu a phalna lo nei tawh te chuan interview kher ngai tawh loin visa thar an dil thei a, visa tinung thar duhte chuan an visa thih hma thla 48 chhungin interview an hmachhawn leh thei nghal a ni.
US-a India mite zinna tura harsatna leh mamawhna te su kiang turin India mite chu India-a US consulate atang ringawta visa dilna beisei lo tur leh Bangkok leh hmun danga US consulate atanga visa te beisei hian harsatna a su kiang dawn a. US-a kal tum ten visa an nghah hun chhung rei lutuk maiin kum thum lai mai a awh tih ziaawm nan kawng hrang hrangah tan lak mek a nih thu thuneitute chuan an sawi a. Kumin kum tir lamah khan United Ambassador to India Eric Garcetti chuan a vawi khatna atana tourist visa interview nghah hun chhung chu za zela 50 aia tamin tih hniam a ni a, kum 2023-a kan tum ber chu visa maktaduai khat buatsaih hi a ni, tiin a sawi a ni.
US-a zin tum ten ni 500 tal nghah ngai
