US aiin Denmark kan thlang zawk -Greenland PM
Greenland prime minister chuan a miten duh an thlang dawn a nih chuan US aia Denmark an thlan zawk thu a sawi.
Jens-Frederik Nielsen-a hian US President Donald Trump-a’n Danish ram chhunga inrelbawlna hran neia awm thliarkar ram luah a tum mek laiin Denmark prime minister nen thuthar lakhawmtute an kawmnaah a sawi chhuak a ni.
Trump-a hian Russia leh China laka an inven nan US-in Greenland ‘neih’ hi an mamawh niin a sawi a. White House chuan lei a rawt a, sipai chakna hmanga luah mai pawh a hnial lo bawk.
Denmark hi Nato member tho a ni a, Prime Minister Mette Frederiksen-i chuan sipai chakna hmanga chhuh tumna a awm a nih chuan Atlantic chhehvel ramte invenna atana an tanrualnain a tawrh tur thu a sawi.
Mihring cheng tlemna ram ni mah se Greenland hi North America leh Arctic inkara awm a nih avangin missile hmanga beihna laka inralrinna siamna hmun atan leh heng lai vela lawng chetla thlithlai nan remchang tak a ni bawk.
Trump-a hian US ram himna atan Greenland hi a pawimawh tak zet tih a lo sawi tawh thin a, finfiahna sawi lang lovin ‘Russian leh Chinese lawngten an luah nasa’ niin a sawi.
US hian Greenland hmarthlang kil, Pituffik base-ah sipai 100 chuang a dah sa reng a, he hmun hi Indopui II-na hnu atanga US-in a luah tawh a ni.
Denmark nen inremna an nei sa mek angin an duh chuan Greenland-ah hian sipai tam zawk pawh an dah thei reng bawk.
Kar hmasa khan Trump-a hian Washington-a thuthar lakhawmtute a kawmnaah ram inluahsak theihna tur inremna awm sa hi a tawk lo tih a sawi a, US chuan ‘neitu nihna’ a neih leh ‘Nato pawhin an hriat thiam tur’ a nih thu a sawi.
Danish khawpui, Copenhagen-a thuthar lakhawmtute hmaah hian Frederiksen-i hian ‘kan thawhpui hnai ber atanga nawrna kan dawng hi pawm theih chi ziazang a ni lo’ tiin a sawi a. An hmaah chona lian tak a awm dawn niin a sawi bawk.
Greenlandic prime minister pawhin ram chungchangah hun khirh tawng mek mah se an thliarkar dinna chu a chiang tih a sawi a, “US leh Denmark inkarah thlan tur a nih chuan Denmark kan thlang reng ang,” a ti.
“Thil chiang tak pakhat chu Greenland hian US ta nih a duh lo va. Greenland hian US kaihhruai a duh lo va. Greenland hian US peng pakhat nih a duh lo bawk,” a ti.
Copenhagen-a prime minister pahnihin thuthar lakhawmtute an kawm hi Danish Foreign Minister Lars Lokke Rasmussen leh Greenlandic Foreign Minister Vivian Motzfeldt ten US-a Vice-President JD Vance leh Secretary of State Marco Rubio-a hmu tura an zin chhuah hma lawka neih a ni.
US aiin Denmark kan thlang zawk -Greenland PM
