merica, Canada leh Europe-a dan kengkawhtute chuan India-a inbun, ram hrang hranga pawi khawih thin pawlte nena inzawmna nei mi 24 chu dan lova chetna, silai hmehpuah, mi sum chhuhsak leh kum 2023-a Canada-a Hardeep Singh Nijjar-a thah a nih thlenga dan an bawhchhiatna kaihhnaihah an man thu an puang.
A vaiin mi 37 chu dan bawhchhiatna hrang hrangah thubuai siamsak an ni tawh a, heng zingah hian gangster Lawrence Bishnoi-a pawh a tel a, ani hi India-ah a tang mek a ni.
Los Angeles-a US Attorney’s office thuchhuah chuan Bishnoi-a leh a lieutenant-te chuan an tanna cell atangin ram hrang hranga awm an pawlte chu ‘contraband cellphone leh voice-over internet protocol device hmangin’ an kaihruai niin a sawi a, Nijjar-a that tura thupek petuah an puh bawk.
Mante hi kum tam tak chhung India nena inzawmna nei pawlte thiltih dan an chhui chian hnua an man niin thuneitute chuan an sawi.
“Vawiina dan kengkawhtute hmalakna, Operation Hard Ball hi kum tam tak chhung zet Indian crime syndicate-te’n pawi khawih, mi thah, kah hlum, sum laksak, ramri kaltlanga ruihhlo tawlh leh khawvel hmun hrang hranga thil sual dang, a bik takin Indian awmte zingah nghawng nei lian tak tak a chhuina atanga lo chhuak a ni,” tiin US Department of Justice thuchhuah chuan a tar lang.
Thuneitute chuan tlanchhia 10 an la zawng mek a, an zinga pasarih chu US-ah an awm a, India-ah pahnih an awm a, Europe-ah pakhat an awm bawk.
Chhuinaah hian Bishnoi-a leh Goldy Brar-a ang chi a lieutenant-te bakah Bhagwanpuria gang-te thiltih dan a langsar hle a. India-a inkhuar niin US, Canada, UK, Europe, Australia leh New Zealand-ah pawh an member-te an awm nia sawi a ni.
Thubuai siamsak tam tak chu kum 10 chhung lung in tang leh dam chhung tang tura hrem theihna a ni a.
US Department of Justice chuan Bishnoi gang hi an hnathawhna ramah tharum an thawh a, an chetna avang hian ‘a bik takin India leh ram danga Indian awmte zingah hlauhna boruak a siam’ niin a puh a ni.
Bishnoi-a leh Brar-a hi June 18, 2023-a Canada-a Sikh temple atanga a chhuah laiin Khalistan thlawptu, Hardeep Singh Nijjar-a that tura thupek petua puhin thubuai siamsak an ni tawh.
Chhuitute chuan Anmol Bishnoi (kum 2024-a US-a man) leh Brar-a te hian Lawrence Bishnoi kaihhruai gang thiltih hi an enkawl niin an sawi a. August, 2023 atang khan Gujarat-a Sabarmati-ah lung in a tang a, tun hnaiah he gang hi tualthahna lian tak tak tituah puh an ni a, Maharashtra minister hlui, Baba Siddique-a leh Punjabi rapper Sidhu Moosewala thahnaah pawh an tel nia sawi a ni a. Mi lar, industrialist, politic-a langsar leh infiam mite tibuaitu gang hruaitu dangte nen thawhhona neiin sum lak luhna a nei fo thin.
“State leh union territory hrang hrangah an inzar pharh a. Punjab, Haryana, Chandigarh, Rajasthan, Delhi, Uttar Pradesh, Madhya Pradesh, Gujarat, Maharashtra, Bihar leh Jharkhand te pawh an tel a, an pawla tel turin mi an sawm a, an member-te pawisa an pek, ralthuam supply leh thil dang dang chu ram pawn atangin an vil a, a tam zawk chu Anmol, Goldy Brar leh an thawhpui dang tlem tê-in an enkawl a ni,” tiin India-a dan kengkawhtu pakhat chuan a sawi.
Bishnoi gang hi Khalistan thlawptu pawl, Babbar Khalsa International (BKI) nen pawh an inzawm tlat a, agency-te chuan Anmol Bishnoi leh Brar-a te pawhin hetiang beihpui hi an kalpui niin an ngai.
US, Canada leh Europe-ah Indian gang 24 man
