US chhimchhaka tornado thawkah mi 34 thi

US chhimchhaka tornado thawkah mi 34 thi
US chhimchhak state-te tornado-in a nuaiah mi 34 vel an thi a, Missouri-ah ringawt mi 12 thiin lirtheite a thal a, chenna in tam tak a chhe bawk.
Kansas-ah chuan mi pariat vel thi awmin vaivut khu nasa tak avangin lirthei 55 chuang chesual an awm.
Michigan, Missouri leh Illinois telin state pasariha hmun 2,50,000 chuang chuan Pathianni tuk thleng khan power an la nei lo niin PowerOutage chuan a tar lang.
Khaw awm dan uchuak tak hi heng lai bawrah hian a la awm zui rin a ni a. Louisiana khawchhak, Georgia khawthlang, Tennessee laili leh Florida Panhandle khawthlangah chuan tornado la thawk thei a ni.
Mississippi Governor Tate Reeves chuan an state-a tornado eng emaw zat thawkah mi paruk an thi tih a sawi.
Mississippi laili, Louisiana khawchhak leh Tennessee khawthlangah chuan sabereka khuangkaih thleng thei laka inralrinna tichhuakin Alabama leh Arkansas hmun thenkhatah khaw awm dan uchuak tak thleng thei nia sawi lawk a ni bawk.
National Weather Service (NWS) chuan tui lian thut thleng thei hi thihna thlen thei khawp niin a sawi lawk a. Alabama-ah chuan Inrinni zanah pawh tornado a la thawk bawk.
NWS hian ‘tornado rei daih chiin heng lai hi a tuam’ tih sawiin an dinhmun chu ‘a hlauhawm hle’ tiin a sawi.
Meteorological agency chuan Shelby, Tennessee-ah chuan thlirpui hi darkar khata km 97-a chak niin a chhinchhiah.
Missouri Governor Mike Kehoe chuan an state chuan thlipui leh ruahpui vangin chhiatna tawkin in a chhia a, nunna chân an awm bawk tih a sawi.
Missouri-a emergency management agency chuan tornado 19 zetin county 25 a nuai niin an sawi.
Mi 12 thi awm zinga in pakhat chu tornado hian a nuai darh vek niin an sawi.
Arkansas-ah mi pathum thiin mi 29-in hliam an tuar a, Governor Sarah Huckabee Sanders-i’n emergency a puang.
Georgia Governor Brian Kemp pawhin emergency puangin Oklahoma Governor Kevin Stitt chuan an state-ah mi pakhat a thih thu a sawi ve bawk.
Vaivut thli na tak tlehah Zirtawpni zan khan Texas-ah mi pathum an thi a, car 38 zet an insu khawm.
Vaivut thli thawk hian ram lailia state eng emaw zatah ram kang 100 chuang a timan kai nasa zual a, semi-trailer truck thahnem tak a chhem thlu bawk.
Oklahoma-a ram kang zinga pakhat, 840 Road Fire an tih mai chuan acre 27,500-a zau kang tawhin engmah thelh mih a la ni lo niin Oklahoma Forestry Service chuan a sawi a. Agency hian inralrinna ‘red flag’ a tichhuak.
Tornado hi boruak hnawng, lum bawk si, a sang lama chhova vana boruak vawt nen an intawna insiam thin a ni a. Thlia ken hi hawi zawng hrang hranga a tleh avangin boruak a vir a, sang tak thlengin a invawrh thei.
US khawchhak lamte hi tornado insiam duhna hmun a nih avangin Tornado Alley tih an ni a. Kum 2024 khan tornado kaihhnawiah mi 54 an thi.
Tornado Alley-a a thawh duh hun lai hi May leh June inkar a ni a; mahse, meteorologist-te chuan kumtluanin a thawk thei reng tih an sawi.