US-in a sumdawnpuite lakah chhiah sang la thar

US chuan nikuma President Donald Trump-a’n sumdawnnaa indona a tihpunlun mekah an sumdawnpui ram 60 lakah chhiah (tariff) sang a la thar.
Chhiah sang zawk an laksak tur zingah hian UK, China leh European Union pawh telin an bungrua an lak luh atangin 10% atanga 12.5% inkar a laksak dawn a, American-ten an lak luh zawng zawng deuh thaw an huamtir.
Tariff thar hian a hmaa an kalpui mek, Zirtawp-nia tawp ta a thlak dawn a, an sumdawnpui ramten tha taka tihluihnaa mi hna thawhtir an tihtawp loh vanga hetiang hi ti niin an insawi.
Hetih lai hian US trade expert Caroline Freund-i chuan hei hi ‘tihluihnaa mi hna thawhtir’ kaihhnawih ni lovin Trump-a’n mawlmang taka ‘dan anga tariff a lak theihna tur’ mai a nih thu a sawi.
US Supreme Court chuan kumin kum tir lamah khan khawvel puma tariff an kalpui dan chu dan lo a nih thu a lo sawi tawh.
An thil lak luha chhiah 10%-12.5% lak tumna hi thla hmasa khan White House chuan tihluihnaa hna thawhtir tihtawpna tura hmalakna that loh vangin a lo rawt tawh a ni.
“Vawiina hetianga hmalakna hi mihring dina chanvo palzut leh sumdawnnaa inhnamhnawihte zawng zawng tan a dik a ni,” tiin US Trade Representative Jamieson Greer-a chuan a sawi.
US-in a sumdawnpui ram 60 hnena chhiah sang a lak thar tur hian an thil lak luh 99.4% a huam dawn niin Office of US Trade Representative chuan a sawi.
Tariff tia an sawi mai hi ram pakhatin ram dang atanga bungrua leh service a lak luha chhiah a laksak thin sawina a ni.
President Trump-a’n tariff sang a lak hian an rama company hrang hrang, ram dang bungrua la lutten an lak luh man chhiah an chawi tam sawt dawn tihna a ni.
A la luttute hian an pawisa chawi tam tur chu a vaiin emaw, a then azar emaw anmahni dawrtute pek turin an ti leh dawn a, heti a nih chuan American nawlpuiten man to zawka thil an lei phahna tur leh US sumdawnna nghawng thei a ni.
Trump-a hian tariff sang zawk hi lak chhan hrang hrang a nei a. Heng zingah hian US-a chengten ram dang atanga lak luh to zawka an lei lohva American siam ngei an lei theih nan te, firm-ten US-a thil an siam chhuah ve phahna tur atan te, a laksak ramten ram dang atanga pem leh dan lova US-a ruihhlo an luhpui thin tihtawp nan te, ram dangten US-in Greenland thunun tuma hma a lakna an thlawp nan leh tihluihnaa mi chhawr tihtawp a nih theih nan te a ni.
President a nih leh hnuah Trump-a hian tariff hrang hrang a kalpui tawh a, a thlak fo bawk a. Thenkhat chu bungrua eng emaw bik, thir leh aluminium an lak luh leh mi mal laka chhiah bik siam te pawh a tel.
Chhiah sang lak hi ram dang zawng zawng laka 10%-a a hrut rual laiin India leh Brazil thil lak luh bika 50% a kalpui lai pawh a awm a. Supreme Court chuan heng tariff hi dan lo vek tiin a lo sawisak tawh.
President-in ram danga bungraw lak luha chhiah sang a lak hi mipuiin an tuar viau zel a. US firm tam tak chuan anmahni dawrtute chawi turina tiin an thil man an tisang thin a, heng zingah hian vantlangin an dawr nasat – Target, Walmart leh Adidas pawh an tel.
Mi thiamte chuan chhiah sang lak hian khawvel puma eibar dinhmun than a tithuin nghawng a nei thei tih an sawi.
Hetih lai hian Trump-a sorkar chuan tariff-te hian dollar tluklehdingawn tel sum a thawk chhuak niin an sawi a; mahse, an ramah ngei thubuai an neih nual phah.
Ram tam tak chuan US nena insumdawn tawn lova hmun dang pan an thlak a, president duh dan ang veka thil kalpui an tum bik lo.