US Navy sipai pahnihte chu California-ah China tana enthlatu nia military information pawimawh pe ru thinah puhin man an ni.
Kum 22-a upa Jinchao Wei chu US khua leh tui niin Chinese agent hnena national defence information pawimawh pe ru thina puh a ni a.
Petty Officer Wenheng Zhao kum 26-a upa pawh thlalak leh video thawn chhuaka suma hralhah puhin man a ni bawk a. Heng mi pahnih te contact-tu ber Chinese agent hi mi thuhmun a ni em tih erawh sawi chian a ni lo.
Wei hi Naval Base San Dieogo a hnathawka a kal lam man niin an pahnih hian California-ah manin an awm ve ve tawh bawk a, thubuai rip tak siamsak zui nghal an ni.
Wei hi amphibious assault ship USS Essex a machinist’s mate niin he lawng sensitive information te nei thei tura security clearance nei a ni.
February 2022 khan Chinese agent chuan a be pawp tih hriat a ni a, chutih lai chu US khua leh tui a nih hma vel chiah nia sawi a ni a. Chinese agent chuan Wei hi sum pe in anin lawng thlalak pawimawh leh video te a pe ve thung tia sawi a ni.
Justice Department officials te chuan Wei hian US Marines te maritime training exercise a tel te chanchim kimchang a hrilh an ti bawk.
“Sipaiin a ram aia sum a thlan a, national defence information pawimawh te a pechhuak a nih chuan inphatsanna turu tak niin hma la turin kan inpeih at reng,” tiin US Attorney Randy Grossman chuan a sawi.
China chuan enthlatu atan a hmang tia puhna chu hnawlin Washington-a China embassy thupuangtu Liu Pengyu chuan, “US sorkar leh media-te hian China kaihhnawih inenthlakna chu tul lo takin an tilar hluai thin,” tiin a sawi a. “China chuan US in awmze nei lova China sel a tum fo hi a hnawl a ni,” tiin a sawi bawk.
Petty Officer Wenheng Zhao hi Naval Base Ventura County, Los Angeles bula thawk niin kum 2021 khan Chinese agent researcher anga insawi chuan a be ru tan tia sawi a ni a. Chinese agent hian Zaho hnenah hian Okinawa, Japan-a US military base a radar system diagram leh blueprint te thlaak leh video atan Zhao hnenah hian $ 15,000 a pe tia sawi a ni.
US-in China enthlatu pahnih man
