US in China ‘police station’ dintu man

US prosecutors te chuan New York ah mi pahnih Manhattan a Chinatown chhehvela Chinese ‘secret police station’ enkawltu nia an ngaihte an man.
Lu Jianwang kum 61 a upa leh Chen Jinping kum 59 a upa te New York City a cheng ve ve te chu China tana enthlatu tih leh justice bawhchhia tia thubuai siamsak an ni a. Thawhtan lma khian Brooklyn a federal court hmaah an inlan ang.
China chuan a hma pawhn ram danagh a ruka police station kalpuia an puhna a lo hnawl tawh a, chung hmun te chu a khua leh tui ram danga awm te tana ‘service centres’ zawk a ni tiin a sawi.
Bronx a awm Lu leh Manhattan a awm Chen te hi China Ministry of Public Security aiawha United States a China in police station a din hmasak bernaa sulsutu te an ni, tiin US Department of Justice chuan a sawi a.
He outpost hi kum 2022 favang khan khar ni tawhin FBI tena an chhuichiana an tihchian hnuah khar a ni.
“He thil hian Chinese sorkar in kan ram sovereignty te engahmah ngai lova bawhchia in New York City hmun lailiah secret police station a din a ni” tiin Breon Pearce, brooklyn a top prosecutor chuan a sawi.
China hian khawvel ram hrang hrang 53 velah secret police station 100 chuang a nei tia sawi niin chung zingah chuan UK leh Netherlands ah te pawh a nei a. Thla kalta khan Canda pawhin Montreal area a China secret police station pahnih nia rinhlelh chu an chhuichian thu an sawi bawk.
“PRC’s [People’s Republic of China] chetdan hi ram pakhat chetlakna ang tura pawm theih loh a ni. Authoritarian te vauna ata an him theih nan kan ram cheng te zalenna hi kan humhim sak ngei dawn a ni tiin assistant attorney general Matthew Olsen, Justice Department’s National Security Division chuan a sawi.
Lu hi Chinese law enforcement te nena inhnimhnai tak nia sawi niin kum 2015 atang khan US ah China aiawhin chetla tanin Chinese mi an ram chhuahsan te China ram chhunga an chhung te leh US a awm te a vau thin tia sawi a ni.
Lu leh Chen te hi October 2022 khan FBI te chuan thu zawhfiahna an nei tawh bawk a an phone te pawh mansak niin an pahnih hian China Ministry of Public Security te nena inbiak pawhna an neih thu an nemnghet a, mahse, an inbiakna te erawh an tibo hman vek thung. Thiamloh chantir an nih chuan Lu leh Chen te hian kum 25 thleng lung in an tang thei ang.
US leh Canada a Chinese embassy te chuan heng FBI tena hmun an sawi hi ‘overseas service stations’ tia sawiin pandemic lenlaia an khua leh tui te an driver’s license tihnun leh nan te leh thil pawimawh danga puih an nih theihna tura din tiin a sawifiah thung.
Mahse human rights group te chuan China chuan heng police station an siamchawp te hi ram pawna Chinese khua leh tui awm te vau leh rikrap nan bera a hman an ti ve thung a.
Thla kalta khan Canada federal force te chuan Chinese Canadians te chu Chinese police station atanga vau tawk an awm chuan in hriattir turin ngenna a siam nghe nghe a ni.
FBI Director Chirstopher Wray chuan nikum November thla khan heng police station nia sawi te hi an chhuichian mek thu a sawi a. “Chinese police tena US ah dawr hawnga enirnan New York khawpuiah te phalna leh hriattirna awm lova chet an la hi thil awm ang pawh a ni lo” tiin a sawi a, “Sovereignty bawhchhiatrna niin judicial leh aw enforcement co-operation process bum tumna a ni” tiin a sawi.
Thawhtan khan US officials te chuan China Ministry of Public Security hnuaia thawk officer 34 te chuan US a Chinese mi an ram tlanchhiatsana awm te fake social media account hmangin an vau thin a ti a, hei bakah hian Chinese sorkar propaganda te an thehdarh tiin an sawi bawk a. Heng mi te hi US mai ni lo Asia leh hmun hrang hrangah an inphum ru tiin a sawi bawk.
Prosecutor te chuan heng mi te hi elite task force 912 Special Project Working Group tia hriatlarte an nih thu sawiin antum ber chu ‘Chinese ram tlanchhiatsana khawvel hmun hrang hranga awm te thlurbing a ni’ tiin tarlan a ni bawk.
“PRC sorkar hian a national police leh 912 Special Project Working Group te chu dan leh public safety humhim nana hmang lovin troll farm angah chhuahin kan rama free speech beih nan a hmang a ni” tiin US Attorney Peace chuan a sawi.
Lu leh Chen chungchang hi U court chuan a ngaihtuah zui dawna thiamloh chantir an nih chuan an laka hremna lekkawh a nat hle rin a ni.