US-in duh lo mah se India-in
Russian tuialhthei lei zel dawn
Trump-a sorkarin Moscow atanga tuialhthei a lei avanga hrek nan Indian bungrua a lak luhah chhiah sang tak lak luh mah se India chuan Russian tuialhthei a lei chu an ram eibar atana a that avangin an lei zel dawn tih an finance minister-in a sawi.
Europe leh US chuan Moscow-in kum 2022 atanga Ukraine a rûn mekah Russian tuialhthei leisak hi an ngaimawh hle a, India erawh chuan a man tlawm zawkin Russia atang hian tuipui atangin a la lut zel thung.
New Delhi chuan Russian tuialhthei a lei hi sumdawnna thil an kalpui danah hlawk leh ramin a hlawkpui niin a sawi.
Ukraine-a buaina awm mek hmet mit hlei thei lo, US President Donald Trump-a chuan India-in tuialhthei a leisakna hi Moscow-in indona atan sum hman tur a neih theih phaha ngaiin India hrek nen bungrua a lak luhsakah tariff 50%-a sangin a laksak.
Finance Minister Nirmala Sitharaman-i chuan Zirtawpni khan tual chhung news channel pakhat, CNN-News18 hnenah khawvela tuialhthei lei tam ber pathumna leh hmangtu tam ber, India chuan Russian atanga lak luh a titawp mai dawn lo tih a sawi.
“Kan leisak hi kan tana tha ber tur a ni a. Hei vang hian kan la leisak zel ang tih hi a rinhlelhawm loh,” a ti a, India-in ram danga sum a hman zingah tuialhthei thlitfim loh leh thlitfim sa lei nan a hmang tam ber tih a sawi bawk.
Kum liam ta chhung khan India-in ram dang atanga thil a lak luh zawng zawng zingah hmun lia thena hmun khat dawn chu tuialhthei thlitfim loh leh thlitfim sa a ni.
“Russian tuialhthei a ni em, thil dang pawh ni sela, thutlukna hi a man, a phurh velna leh thil dangah kan tana tha ber tur anga siam a ni,” tiin Sitharaman-i chuan a sawi bawk.
Khawthlang ramten an duh lo em em chunga India-in Russian tuialhthei a leisak zel hi US leh India inkar tichhetu lian tak a ni mek.
Kar kal ta khan Indian Prime Minister Narendra Modi-a chuan Tianjin-ah Russian President Vladimir Putin-a hmuin Chinese President Xi Jinping-a a kawm bawk.
Mi thenkhatin khawchhak ramte intawh khawmna, ‘Axis of Upheaval’ tia an sawi mai, North Korea leh Myanmar te pawh telnaah Modi-a’n Putin leh Xi-a a kawm hian New Delhi-in Washington hlat a tum tih chiang taka lantirtu-ah a ngai.
US Commerce Secretary Howard Lutnick-a chuan Zirtawpni pawh khan Washington nena insumdawn tawnna turah indawra Russian tuialhthei lei tawh lo turin a la ti reng.
“Inbiak kan duh reng a. Chinese-te kan leisak a, Indian-te kan leisak bawk a. Anmahni leh mahni chu an inleisak tawn thei lo. Khawvela thil leitu tam ber kan ni,” tiin Lutnick hian ‘Bloomberg Surveillance’ program-a an kawmnaah a sawi.
India chu thla hnih khatah a hawi kira Trump-a hnenah inchhira sumdawnna lam hawia inrem a duh leh ngei a rin thu a sawi.
Thla hmasa khan US trade thuneitute chu New Delhi-ah zin tura tih an ni a, thulh thut niin a hnuah ram pahnihte hi an indawr zui leh tawh lo.
US Treasury Secretary Scott Bessent-a chuan India hian man tlawm taka Russian tuialhthei leiin man to takin a thlitfim sa a hralh leh niin a sawi.
US-in duh lo mah se India-in Russian tuialhthei lei zel dawn
