US chuan Gaza ah indo chuhah hnuah a tum khat nan tanpuina a thawnlut ta a, tanpuina te hi military thlawhna hmangin parachute hmangin 30,000 chuang a thlak thla a ni.
US chuan Jordan air force te nen inthurualin tanpuina te hi an thlak a, President Joe Biden chuan tanpuina an la thawn luh zui zel tur thu a sawi a.
Hetih lai hian US official te chuan Gza ah kar ruk tal inkahhai a awm theih nana ruahmanna chu kalpui mek a ni an ti bawk a.
Biden administration chuan Israel chuan inkahhai a rawtna chu a thuphungin a pawm tawh a ti bawk a.
“Hamas tena mitang an chhuah zalen a nih chuan Gaza-ah kar ruk chhung inkahhai a awm nghal ang,” tiin official chuan a sawi a.
Pathianni khan Cairo ah mediator ten inbiakna an nei leh niin Egyptian official te chuan an sawi a, inbiaknaah hian Hamas leh Israel te pawh an tel dawn a ni.
Official pakhat chuan technical issue thenkhate la sawiho ngai a amw tih mai chauh a nih thu sawiin Palestinian ten Israeli mitang engzah nge an chhuah zalen ang tih velah inremna an la nei thei lo tiin a sawi a.
Kar kalta Inrinni khan C-130 transport plane chuan Gaza coastline ah tanpuina 38,000 chuang a thlak tiin US Central Command chuan a sawi bawk a.
“Hengte hi Gaza-in tanpuina tam zawk a neih theih nana ruahmanna leh land corridor leh kawngpui te hawn a nih theih nana ruahmanna kal zel,” tiin a sawi bawk.
Gaza-ah hian a hma pawhin UK, France, Egypt leh Jordan te chuan tanpuina an lo thlak tawh a, US chuan tun hi a thlak tumkhatna chauh a ni thung.
Kar kalta Zirtawpni khan President Biden chuan US chuan Israel in truck tam zawkin Gaza a luh theih nana remtihna pe tura a nawr tur thu a sawi bawk a.
US Vice-President Kamala Harris chuan Israeli war cabinet member Benny Gantz chu Thawhtanni hian inkahhai leh issue pawimawh dang a sawipui dawn bawk.
Hetih lai hian UN World Food Programme chuan northern Gaza chuan tam a tawk thei reng tiin a sawi a, tun hnaiah tanpuina a hmu tlem si a, mi 300,000 vel te chuan tui thianglim leh eitur an nghak mek tiin a sawi a. Gaza indona avang hian Israel chuan tanpuina lut tur a thunun tlat bawk avangin harsatna a nasa a ni.
US-in Gaza-ah tanpuina thlak thla
