India-in Iran lawngchawlhna Chabahar port kum 10 chhung atana enkawl tura contract a ziahfel hnu lawkah US chuan vaulawk nghalin Tehran a hrekna chu kalpui mek niin Tehran nena sumdawngte chuan risk an la tih an hriat a ngai tiin a sawi.
New Delhi chuan Thawhtanni khan Chabahar port enkawlna tur contract a ziak a, hei hi Central Asia a sumdawnna zau zawk kalpui a tumna a ni. Gulf of Oman a port hmang hian Indian goods te chuan landlocked Afghanistan leh Central Asia te chu International North-South Transport Corridor hmanga road leh rail project kalpui hmangin a thleng thei dawn a ni. He kawng hian Pakistan a hel a, India chuan kum 2003 daih tawh khan ruahmanna a siam tawh a, mahse, US-in Tehran a hrekna avangin port development tihchak theihin a awm lo a ni.
India-in Iran nena inremna an siam chungchangah US Department of State deputy spokesperson Vedant Patel chuan, “Chabahar port chungchangah Iran leh India in inremna an ziak tih kan hria a. Government of India hian a foreign policy kaihhnawihah leh Chahbar port chungchang leh Iran nena an inlaichinnaah an duh an ti thei. Ka sawi duh chhun chu United States nena inkaihhnawihna a awm a nih chuan US chuan Iran chu a la hrek mek reng a, a hrekna a lekkawh zui zel ang,” tiin a sawi a.
“Tu pawh Iran nena sumdawnna kalpui duh chuan US hrekna avanga harsatna awm thei te an manfiah tur a ni,” tiin Patel chuan a sawi bawk a. Tu te mah US chuan Iran nena sumdawng hriatthiamna pek bik a nei lo tiin a sawi bawk.
Chabahar port Plan
Chabahar port develop nana long-term agreement plan chu Indian Ports Global Limited leh Port and Maritime Organisation of Iran ten an ziak a. IPGL te chuan port develop nan $120 million vel seng dawnin chubakah $250 million vel chu loan an la dawn bawk a ni.
Inremna ziahna Tehran a neihah Sarbananda Sonowal, Union Minister for Ports, Shipping and Waterways leh Iran’s Transport and Urban Development Minister Mehrdad Bazrpash ten an ziak a ni.
Inremna thar hian 2016 agreement chu hnawlin, khatah kha chuan India chuan Chabahar port a Shahid Beheshti terminal a enkawla kum tina tharthawh leh thin a ni.
Tun hi India-in ram dang lawngchawlhna management a enkawl hmasak ber niin kum 2024-25 ah Ministry of External Affairs chuan Chabahar Port enkawlna atan hian Rs 100 crore a dah a ni.
“Kum 10 chhung port enkawlna tura inremna hian ram pahnih te inlaichinna tihngheh a nihzia a pholang a ni,” tiin thuchhuah chuan a tarlang a. “He contract hmang hian India chuan hun rei tak Chabahar-ah inhnamhnawih a tumzia pholan a ni,” tiin Union Minister Sonowal chuan a sawi bawk.
Chabahar port hi 7,200-km-long multimode transport project India, Iran, Afghanistan, Armenia, Azerbaijan, Russia, Central Asia leh Europe te a bungrua inthawn nana nternational North-South Transport Corridor project tiha hmun pawimawh chungchuang a ni.
Chabahar port enkawl a nih theih nan hian kum 2003 khan inbiakna neih hmasak ber niin Iranian President Muhammad Khatami an India a tlawh tumin inbiakna neih a ni a. Kum 2013 khan India chuan port development atan $ 100 million a pechhuak tawh bawk a. May 2015 ah MoU ziah niin kum2016 a PM Modi an Iran a tlawh tumin contract ziah a ni zui a ni.
Gujarat a Kandla port chu Chabahar hnaih ber niin 550 nautical miles-a hla a ni a, Chabahar leh Mumbai inkar hlat lam hi 786 Nautical Miles a ni thung.