Daily Newspaper

US-in inkhung hran bituk pawt tawi

46

US chuan Covid-19 kai te inkhung hran hun tur ni bituk a pawt tawi a. US Centers for Disease Control chuan hripui kai la na lote khung hran hun pawh tawi a remtih tak thu President Joe Biden chief medical adviser Anthony Fauci chuan a sawi a.

Kar kalta khan US health officials te chuan positive-te khunghran hun ni 10 tih chu ni 5-ah a pawt tawi a.

Fauci chuan US a leng darh mek omicron variant chu na lo zawk leh a kai te pawhin an lak nat loh zawk a nih thu a sawi a. Mahse, vaccine la lo American-te tan chuan an kai a nih chuan na tak a nih theih thu a sawi bawk a. “Delta letin inkaichhawn a awlsam zawk,” tiin a sawi bawk.

Covid avanga damdawi In awm ngai US-ah nitinin an pung zel a, nikhatah hripui kaithar 400,000 vel zel awm ang mek an ni bawk.

State tam tak te chuan staff tlakchhamna an neih avangin National Guard te tanpuina an ngen hial bawk.

US mipui puitling 73 per cent te chu vaccine dose hnih la tawh niin 36.3 per cent te chuan booster shot an la tahw bawk niin US Centers for Disease Control and Prevention chuan a sawi.

Tun hnaia UK-a zirchianna neihah delta variant thlaktu omicron chu delta aia hlauhawm lo zawk tih a ni a. Omicron hi South Africa-a nikum November thlaa hmuhchhuah kha niin South Africa-ah chuan a vawrtawp thleng tawhin nunna chan pawh delta variant lenlai aiin an tlem zawk.

Anthony Fauci chuan omicron chu leng nasa mahse school hawn tho tur ti bawkin chutihrual erawhin hmaituamna vuah leh invenna dang dan siamk te chu zawmthat ni se, naupang vaccine la thei chin te chu an nu leh pa ten laktir ngei se a tul thu a sawi bawk.

School naupang te vaccine pek leh hmaituamna vuah kalpui chungin school hawn reng tur ani, tiin US Education Secretary Miguel Cardona chuan a sawi bawk.

Hetihlai hian Israel chuan kum 60 chin chunglamte hnenah coronavirus vaccine dose li-na a pe dawn tawh thung. Hei bakah hian medical staff an dose lak hnuhnung thla li chin tawh te chu an pe tel dawn bawk niin Prime Minister Naftali Bennett chuan a sawi. Israel hian karkalta khan nursing home a awm leh geriatic wards a damlo te hnenah dose lina a lo pe tawh bawk.

Omicron avang hian Israel-ah kar kalta khan hripui kai 5,000 chuang hmuhchhuah niin Bennett chuan hripui kai hian nikhatah 50,000 an la tlin chhoh theih hial an rin thu a sawi bawk.

Australia sorkar chuan Omicron avanga hripui kai thar 37,000 chuang an awm chung leh damdawi In panpui ngai an pung chungin economy hawn an tum tawh thu a sawi thung.

“Hripui kai thar zat ngaihtuah lovin a la na chin zawk kan ngaihtuah a ngai a, hripui nena len dun thiama, kan hriselna veng tho chungin economy kan kaltir a ngai,” tiin Prime Minister Scott Morrison chuan a sawi.

Federal Health Minister Greg Hunt chuan Omicron chu inkaichhawn awlsam zawk ni mahse variant dangte aiin a hlauhawm lo zawk tiin a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy