US in Israel hnenah ralthuam hralh dawn

US in Israel hnenah ralthuam hralh dawn
US Department of State chuan Cpongress hnenah hriattinra pe in Israel hnenah ralthuam $8 billion hu hralh a tum thu a hrilh.
Heng ralthuam te hi missiles, shells leh munition hrang hrang te niin Israel hnena hralh a nih theih nan hian House leh Senate remtihna lak ngai a ni.
President Joe Biden chuan White House a chhuahsan tep tawh laiin ralthuam hralh hi tum niin Gaza indonaa civilian nunna chan an tam em avanga Israel thlawpna titawp tura nawrna chu Washington chuan a hnawl bawk a ni.
Nikum August thla khan US chuan Israel hnenah fighter jet leh ralthuam dang dang $20 billion hralh a lo remti tawh bawk.
Tuna US in ralthuam a leitir turah hian air-to-air missiles, Hellfires missiles, artillery shells leh bomb te pawh an tel tiin US official te chuan an sawi.
“President chuan Israel in a khua leh tui te international law leh international humanitarian law kalh lova venhimna turin rights a nei a ni a, hei mai bakah hian Iran leh a thurualpuite lakah inventheihna a nei a ni a ti a. Israel vehimna hi kan buaipui zui zel ang a ti” tiin US official chuan a sawi.
Biden chuan US in Israel a thlawp tlat dawn tiin a lo sawi fo tawh a. Israel hnena ralthuam pe hnem ber chu US a ni bawk.
Stockholm International Peace Research Institute (SIPRI) te chuan kum 2019 atanga 2023 inkar chhunga ralthuam lian tham Israel in a lei 69% zet chu US hnen atanga a lei a ni an ti.
May 2024 khan US chuan Israel in Gaza city Rafah a ground operation a neihin sawisel a hlawh em avangin israel henna bomb 2,000lb leh 500lb a pek tur chu a thulh lailawk a, chu chu Washington ah Republican ten nasa takin an sawisel a, Netanyahu pawhin a sawisel bawk a. Biden chuan a thu zuk zuiin harsatna a siamzui ta lo bawk a ni.
Tuna Israel hnena ralthuam hralh tur hi Biden an 20 January 2025 a White House a chhuahsan hmaa Israel hnena ralthuam a hralh hnuhnung ber tur a ni bawk a ni.
Biden thlaktu tur Donald Trump pawh Israel thlawp burtu niin thuneihna a chan hnuah chuan indona tihtawp a tum thu sawiin Gaza a military operation pawh tihtawp a nih theih nan hma a lak tur thu a lo sawi lawksa tawh bawk.
7 October 2023 a Hamas tena southern Israel beithuta mi 1,200 chuang nunna laa mitang 250 vel an hruai chhanlet nan Israel chuan Gaza ah military operation a kalpui zui a. gaza indona avang hian mi 45,580 chuangin nunna an chanphah tawh tiin Hamas enkawl health minstry chuan a tarlang.