US in a leibat theih bituk debt ceiling tihsan tumna chuan sawi a hlawh leh hle a. Hei lo hi kawng dang a awm em? Denmark in chhanna a nei tia sawi a ni.
US Congress chuan an ram in sum an puk theih chin chu bituk that a tum leh mek a. Political party pahnih tena inremtlanna an nei thei a nih chuan a tha ang a, a nih loh chuan US chan a history ah a tum khat nan leiba rul thei lovin a awm dawn tihna a ni bawk.
Leiba rul thei lovin awm ta se chuan global financial market nasa taka ngawng nghal tur niin US economy tan pawha pawi tak tur niin mithiam te chuan an ngai a.
Mahse, Republicans te Congress lower chamber thunun tute chuan sum hman phalna pekchhuah hma in sum senna tur tihtlem an ngiat tlat thung si a ni.
US in leiba a neih theih chin bithliah hi kum zabi chuang kaltaa siam tawh niin US danglam tak a nihna pawh a ni a.
Industrialised ram zingah US tihlohah Denmark ram chauh chu debt eiling nei mumal awm chhun a ni a, mahse, Washington a drama hrang hrang thleng nei nuai angin engmah an kalpui ve ngai lo thung.
Danes ho debt ceiling chu sawi pawh hlawh ngai lo a ni a, a chhan ber pawh debt ceiling dinhmun derthawng hnaiah an awm ngai lo hrim hrim
‘Gaeldsloft’ tia sawi niin Danish te chuan kum 1993 khan an lokalpui tan tawh a ni a. “Sorkar in a duh ang anga black cheque a siam mai loh nana tih a ni” tiin Las Olsen, chief economist, Danske Bank chuan a sawi a.
American leh Danish law te hi in ang tlangin a lang na a, a thawh dan erawh a danglam hle tung. “Danish politician te chuan formality anga an ngaih a ni a, political issue a ni ve lo” tiin Olsen chuan a sawi a.
“Parliament chuan sum senna tur remtihna a pe tawh a, tax lak dan turah ruahmanna a pawmpui tawh bawk a” tia sawiin lsen chuan, “Hei vang hian sorkar in a tula sum a pukpelh remtihloh ngawt chu thil awm ang lo a ni ang” tiin a sawi.
Danish te hian debt ceiling DKK 2 trillion ($284bn) ah an bithliah a, ram tenau Denmark te ang tan chuan sang tak niin sorkar chuan loan tam tham tak pawh a la thei tihna a ni bawk.
“Tuna Denmark state in leiba a neih hi DKK 645 billion chauh a ni a, hei vang hian debt ceiling phak tur chuan a la thui hle” tiin Olsen chuan a sawi.
Ceiling hi tum khat hlihthlak tawh niin chu chu kum 2010 a a leta tihpun a nih vang zawk khan a ni a. Khatihlai kha 2008 financial crisis awm lai kha niin debt ceiling tihsan chu Danish political party te remtih tlan vek a ni.
“Khatihlai khan sorkar chuan economy siamtha turin hun reilote chuhnga sum tam tham tak a puk kha angai tlat a ni” tiin Olsen chuan a sawi.
Chutihlaiin American ceiling erawh tum 78 lai kum 1960 atang khan tihsan tawh niin Republican president hnuaiah tum 49 leh Democrat president hnuaiah tum 29 tihsan a ni.
Olsen chuan Danish politician te chuan budget a sum hman dan turah an ngaihdan a in ang mawh khawp a, mahse, sum enkawl dan turah erawh an thurual thin tiin a sawi thung a.
Denmark leh US danglamna chu Denmark chuan kum telin leiba a nei tlem tial tial a, kum 2022 ah phei kha chuan budget surplus nei tawhin a leiba tam tham tak a rul thei tawh a ti bawk a.
“Denmark chuan saving an uar nasa” tin Olson chuan a sawi a, “Hun reiah economy a that zel an duh a, nakinah chuan pensioner tam tak an la awm dawn tih an hriat vang a ni” tiin a sawi.
US leiba hi kum 1980 chho atang khan a pung thur thur a, US in kumkhat a thawhchhuah aiin sorkar in leiba a neih a tam zawk bawk a. Kum 2013 khan a GDP aiin aleiba a tam tawh a, tunah phei chuan a leiba in $31 trillion a hawlh tawh dawn bawk.
EU member state te chuan leiba GDP atanga 60% pel lo turin ruahmanna an siam a, mahse, atakah chuan zawm a hlawh lem lo. US ratio chu tunah 128% a ni mek a, chu chu Japan, Greece leh Italy te ai chuan hniam tak a la ni veleh thung.
Denmark chu danglam tak niin debt ceiling aneih bakah European Union cap zawm duh a ni bawk tiin Olsen chuan a sawi.
Sorkar in tax atanga sum a lakluh aia tam a hman chuan sorkar in sum a puk a ngai tihna a ni a.
World War I hnu atang khan US chuan sum a puk theih tur cin bithliah – debt ceiling- siamin a tul dan a zirin Congress ah vote hmangin tihsan thin a ni thung.
Kumin hian Senate chu Democrats ten an thunun a, House chu Republicans ten an thunun bawk si avangin an remtih lan ve ve ngai a ni thung a. US hian a leiba rul thei lovin a la awm ngai lo va. A rul theilo emaw a nih chuan global economy in a tuar thei hle dawn a ni.
US in leiba ngah zel, bat belh tum bawk
