US-in muanna atan Kyiv hnenah himna pek tum
US chuan inkahhai a awm theih nana Berlin-a European leh Kyiv palaite nen an inbiaknaah Ukraine hnenah Nato ang chi himna pek theih a intiam a, hetih lai hian ram inpekna tur erawh an mutan a la ni rih.
Nato Article 5-a himna inpek tawn ang chi ‘himna tha tak’ pekna tur siam a nih thu US thuneituten an sawi a, Russian-te pawhin an pawmpui ngei an beisei.
US thuneitute hian indona titawp tura hma an lakna kal zelah muanna atana inremna siam an tum chuan eng ang takin Ukraine-in a ram a hloh phah dawn tih erawh an la sawi lang lo.
Ukranian President Volodymyr Zelensky-a chuan an inbiakna hi ‘hlawk tak’ tih a sawi a, a awlsam lem lo thung niin a sawi.
Kyiv chuan eng thil pawh ni se ching fel turin ‘an himna tur tha tawk’ a tul hmasa phawt tih a sawi bawk.
Ukraine hian indona kal mek titawp tur chuan himna tha tawk an neih phawt a duh a, hei hi Russia-in inkahhai a zah nan leh an ram chu rûn nawna an awm tawh lohna tura inven nana an tih a ni.
US thuneitute chuan himna pek an tum hi ‘platinum standard’ an ti a, chutih rual chuan inremna ang hian ‘thil a kal kumkhua dawn em tih erawh hriat loh’ a nih thu an sawi.
Pathianni khan Zelensky-a chuan a vawi khat nan himna tha tawk tak an nei dawn a nih chuan an tum ber pakhat, Nato zawm chu thlauhthlak mai an pawi ti lo tih lam hawiin a sawi.
Himna lama an duh hi ching fel thei angin lang tan mah se an ram khawchhak lama Moscow nen an inchuh, Donbas chungchang sawi fel an la hmabak.
US chuan Donbas hmun thenkhat hi ‘economic-free zone’-ah siam an rawt a; mahse, hemi tur chuan Ukraine-in sipai an la dahna hmun atanga thenkhat an hnuh kir a ngai dawn a, Russia hian an hnuh kir a rinawm ve chiah lo bawk.
“US leh Ukraine hian tanhmun inang lo an nei niin ka hria,” tiin Zelensky-a chuan a sawi.
US thuneitute hian economic free zone chu nakin zela lehlam lehlamin ram chin buai chin an tihfelna tur niin a sawi ve thung.
Donbas hi a tam zawk Russia-in an thunun niin Kyiv-in a vaia an kuta an hlan an duh laiin Ukraine hian a phal lo va, hei hi an buaina ber a ni mek rih a ni.
US thuneitute chuan Senate-in a thlir ve turin Kyiv hnbena himna an pek tur chu Washington-ah an theh lut dawn tih an sawi.
White House atangin US President Donald Trump-a chuan Zelensky leh European hruaitute nena an inbiakna chu ‘hlawk tak’ a nih thu a sawi a. “A hma zawng angin kan hnaih ta,” tiin inremna awmna tur an hnaih zel tih a sawi.
Inbiakna thlengtu, German Chancellor Friedrich Merz-a pawhin a vawi khat nan inkahhai a awm theih hmel hle tih a sawi ve bawk.
Inbiakna awm zui zel turah European Commission President Ursula von der Leyen pawhin Ukrainian leh US palaite inbiaknaah a tel ve dawn.
US-in muanna atan Kyiv hnenah himna pek tum
