US-in resolution a veto China-in a dem

China chuan Gaza a inkahhai a awm theih nana resolution siam tum US in a veto chu natakin a sawisel.
Beijing chuan indona kal zel rawh se tihna ang a nih thu a sawi a. US thung chuan Algeria rawt resolution chuan indona tawp theih nana inbiakna te a ti thuanawp zawk dawn a ti ve thung.
US chuan ceasefire resolution aama siam rawt chhuak thungin chutah chuan Israel in Rafah khawpui a bei tur a ni lo tih pawh a tel thung a.
Gaza a indona kal mek zel kara Algeria resolution US in a dang chuan dem a hlawh hle a. UN Security Council chhungah member 15 ah 13 in an thlawp a, UK a hai a, US in a veto thung a ni.
UN a China ambassador Zhang Jun chuan resoltuion chuan indona kal mek tihtawp a nih thieh nana diplomacy hmanga inbiak a tithuanawp ang tia ngaih chu awm ang lo tiin a sawi a.
“Tuna inkahhai awm se tia rawtna duh tlatloh hi mihring suatna kalzel rawh se tihna tluk a ni” tiin Zhang chuan a sawi a, “Indona kaihhnawih chuan Middle East region sinhmun derthawngah a siam a ni” a ti bawk a.
“Chu chu Gaza indona meialh kan tihreh chauhin Middle Region a kankai tur kan veng thei” tiin a sawi bawk.
Algeria top UN diplomat chuan “vanduaithlak takin Security Council chu a hlawhchham leh ta” tia sawiin, “In chhia leh tha hriatna te ennawn ula, history in engtin nge a ngaihzui ang che u chhut rawh u” tiin Amar Bendjama chuan a sawi bawk.
US thawhpui ram dang te pawhin an sawisel tho va. France UN envoy Nicolas de Riviere chuan resolution pawm a ni lo chu pawi a tih thu a sawi bawk.
Linda Thomas-Greenfield, Washington ambassador thung chuan Hamas leh Israel tena inbiakna an neih mek laia inkahhai lo rawt chu a hun lo a ti ve thung a.
UK ambassador Barbara Woodward pawhin inkahhai lo rawt chuan inbiakna kalmek a tithuanawp thei zawk tiin a sawi bawk.
7 October 2023 a Hamas silai keng tena Israel luta mi 1,200 chuang an tihhlum hnuah leh mitang 240 an lak hnuah Israel chuan Gaza a run zui a. Hei vang hian Gaza ah nunna chan 29,000 chuang an awm tawh niin Hamas enkawl health ministry chuan a tarlang.
US in inkahhai a awm theih nana draft resolution a siamah chuan Hamas chuan an mitang kawl te an chhuah vek tur a ni a, tanpuina in Gaza a lut tur a ni bawk tih a ni thung.
White House chuan a hma chuan inkahhai tihtawngkam a hmang duh lo thung a, mahse, US ruahmanna hi Security Council in a pawmpui ngei dawn em tih a chiang chuang lo.
US chuan Israel in Rafah a bei zui a nih chuan civilian tam tak tan harsatna thlen dawnin a bik takin thenawm Egypt ah raltlan an tam lutuk dawn a ti bawk.
Mahse Thawhlehni khan Israel Prime Minister Benjamin Netanyahu chuan an ntum an hlen hma loh chuan indona chu an kalpui zui zel dawn tiin a sawi thung.
Rafah khawpuiah hian Gaza Strip mihring zah ve lawih an awmkhawm mek anga ngaih a ni a, Gaza chhimlama awm niin Egypt nena inrina laia awm niin indo hma in mihring 250,000 vel cheng anga ngaih a ni.
Israel war cabinet member Benny Gantz chuan a hma in Hamas tena 10 March hmaa an mitang kawl te an chhhuah lo a nih chuan Israel chuan Rafah khawpui a luhchilh tur thu a lo sawi tawh a ni.