US President Donald Trump-a chuan Russia hrekna tura tih eng emaw zat chu a taka hman tan hma ni hnihah a dang a, Ukrainian President Volodymyr Zelensky-a nena an inkar a khi zau zel.
Hrekna tur hi US Congress-in a pawm tawh niin president pawhin September thlaa a hming a ziah hnan tawh an ni.
Trump-a hian Zirtawpni zan khan executive order tichhuakin hrekna tur thenkhat chu US tana tha turin tihkhawlai a ni tih tar lan a ni a, US rorel khawm member-te thin a rim hle a. Zelensky-a pawh a lawm lo hle.
US Secretary of State Marco Rubio-a chuan hrekna hman leh loh tur hi ni 60 chhung a nih tur thu leh hetih chhung hian khawvel eibar a nghawng dan tur an thlir dawn tih a sawi.
US-in hrekna a kalpui thar turah hian Russia-a an eibar nghawng tur pawh a tel a. An tuialhthei leh boruakalhthei lei tam ram nga lakah chhiah 100% thleng lakna tur telin hei hi China leh India ten an tawrh ber tura ngaih a ni.
Heng bakah hian President Vladimir Putin-a tela Russian hotu lawk hrekna tur te, Moscow-in a ruka bungrua a thawn chhuahna lawng, ‘shadow fleet’ an hrekna turte pawh a tel.
Rubio-a chuan Trump-a hian ni 60 chhung hi ‘hrekna leh chhiah sang lakin khawvel eibar bakah US a nghawng theih dan tur’ zirna atan a duh tih a sawi.
Hetih lai hian Russia-in a beih mek, Kyiv leh Washington inkar chuan chhiat lam a pan zel a, kar hmasaa US-in Russian diesel la lut tura inremna a siampui atang khan a intan a. Ukraine chuan sipai thila anmahni puitu lian ber, Trump-a sorkar chu an lakah a inhnukdawk niin a sawi a ni.
US-in hrekna a tihkhawtlai hian Russia chu nasa taka a chhawk tura ngaih a ni a. An palai, Kirill Dmitriev-a chuan Trump-a thupek chu ‘pawimawh leh hriat reng tur hun’ tiin a sawi.
Hetih lai hian Ukraine-ah chuan thinrimna a thlen a, Zelensky-a chu hun rei tak atang tawha indona atana sum a neih theihna hrek tura Russia duhtu a ni a, hrek a ni leh dawn ta rih lo hian a tilawm lo hle.
US-in Russia a hrekna tur tikhawtlai, Ukraine a lawm lo
