US chuan Syria leh Iraq-a Iranian target-te beih tur tiin thutlukna siamin ruahmannate a pawm fel tiin CBS news chuan a tarlang.
Strike chu ni eng emaw zah chhung a tahtawlin awmze nei takin neih a ni ang, tiin official-te chuan an sawi a. Khawchin awm dan azirin chet an lak tur thu tarlan a ni bawk.
US hian Jordan-a hmun a neiha awm US sipai pathumte drone hmanga beiha tihhlum an nih avangin a chhanletna tur a ni a. US chuan Iran thlawp militia group-te chu mawhphurtuah a ngai a ni.
Islamic Resistance-in Iraq-te chuan militia thahnem tak neiin, heng mite hi Iran Revolutionary Guard force tena ralthuam leh sum hmanga an thuam a ni a. Pathianni a US hmun beihna chu an tih a nih thu an puang tawh bawk.
Iran erawh chuan US base beihnaah inhnamhnawihna a nei lo tiin a sawi thung a. Jordan-a US hmun hi Tower 22 tih niin drone hmanga beihnaah mi 41 in hliam an tuar bawk.
US official-te chuan an facility beihna drone-te chu Iran siam niin an sawi a, he drone tho hi Iran chuan Ukraine a runnaa a hman atan Russia hnenah pawh a lo pe tawh bawk.
News conference a neihnaah US Defence Secretary Lloyd Austin chuan an chhanlet nghal vat lohna chhan sawiin, “Kan beih tur kan thlan hunah kan chhang let ang” tiin a sawi.
“A titute ngei leh mawhphurtu te ngei chauh kan beih a ngai a. Chu mai bakah nasa zawka a darhzau zel loh kan duh bawk” tiin a sawi.
US military-te chuan bei duh se khawchin chhiaah pawh engmah buaina leh harsatna awm lovin an bei thei tho va, mahse civil mi tena an tawrh duh lovin khawchin tha an thlang zawk, tiin official pakhat chuan a sawi thu CBS news chuan a tarlang bawk.
President Joe Biden chu Republican lawmaker ten Iranian leilung ngei beia chet la turin an nawr nasa hle a. Mahse, Biden leh Washington official-te chuan Iran nena indona zau zawk leh helai region vel buaina tihpunlun an duh lo thung.
Hei vang hian Iran ram chhung beih ai chuan US chuan Syria leh Iraq-a Iranian target-te beih chu an thlang ta zawk tia sawi a ni.
Iran thlawp militia group ten nikum Ocrober 7-a Israel-Hamas indona chhuah hnuah US leh Israel nena inzawmna nei thil te an bei nasa hle tawh a ni.
Yemen-a Iran thlawp Houthis-te chuan Red Sea leh Gulf of Aden-a lawngte chu missile-in an bei fo a, US pawhin a bei let bawk.
US defence official-te chuan zan lamah Gulf of Aden-ah drone an kahthlak thu sawiin, chu mai bakah unmanned sea drone pawh Red Sea-ah tihchhiat a ni an ti bawk.
US-in Syria leh Iraq-ah phuba lak ngei tum
