US inrawlh mah se DR Congo-ah helten khawpui la zel
Democratic Republic of Congo khawchhak lam ram leilung hausa laia sorkarin khawpui a luah chhun ni tawh chu hel pawlten an luh tan ta a, mi cheng tam tak chuan an thenawm, Burundi an pan phah mek niin a chengten an sawi.
Uvira-ah hian laipui leh silai puak ri hriat tur a tam hle niin mi chengte chuan an sawi a, a hlauhawm hle tih an sawi.
Kar hmasa maiah khan US President Donald Trump-a chuan DR Congo President Félix Tshisekedi leh Rwanda President Paul Kagame te chu rei tak an intihbuaina titawp turin remna a sawipui.
M23 hel pawl hian khawpui chu ‘an chhuah zalen’ tih an sawi a, UN-in a puih Radio Okapi pawhin mi chengten kawtthlerah helho an tei suau suau tih an sawi bawk.
Hetih lai hian South Kivu Governor Jean-Jacques Purusi chuan Burundi khawpui, Bijumbura atanga km 27 chauha hla khawpui hi sipai leh an thawhpuiten an la thunun niin tual chhung chanchinbute hnenah a sawi.
Burundi hian DR Congo nena an inrina an khar niin Burundian sipaiten an sawi niin AFP news agency-in a tar lang.
Mi cheng pakhat chuan M23 fighter-te hi hlawm khatin Uvira khawpuiah hian hmarchhak atangin an lut a, lo daltu an awm lo niin a sawi a. Mi cheng thenkhat chuan an lo lut hi an lo lawm niin a sawi bawk.
Khawpui hi kharkhip a ni a, dawr leh sikul khar a ni a, , mi tam zawk in chhungah an awm.
Tual chhunga mihring dikna chanvo humhalhtu hotu chuan sipaiten an lo bei let a nih chuan ‘insuatna nasa tak’ a thleng thei niin AP news agency a hrilh.
Sipai leh venhim hna thawktute chuan helho hi khawpui hmar lam, Burundian ramri atangin an lut niin an sawi.
Burundi hian DR Congo khawchhak lamah sorkar pui turin sipai tam tak an dah a. An hruaitu, Évariste Ndayishimiye-a chu kar hmasa khan Washington-ah kalin inremna ziahnaah a telpui.
Thawhlehni khan US, European Union leh European ram pariat chuan Rwanda chu helte puiah an puh a, inkahna titawp nghal turin an ti bawk.
Thuchhuah intawm an siamah Rwanda Defence Force (RDF) chu DR Congo khawchhak lama ‘beihpui thlak titawp nghal’ turin an ti a, an sipaite hnuk kir turin an ti bawk.
Rwanda erawh chuan indonaah an inrawlh loh thu an sawi a, DR Congo sorkar leh an thawhpui, Burundi chuan inkahhai an bawhchhia niin an puh let.
UN chuan tun thla tir lama indona a chhuah thar leh atang khan mi 2,00,000 vel an tlanchhe tawh niin an sawi a. Mi 74 vel thi awm tawhin a tam zawk hi civil mi an ni a, hliam tuar mi 83 enkawl an nitih an sawi bawk.
Burundian thuneitute chuan ni hnih chhungin mi 8,000 chuang an ramah an lut a, chawlhkar khat chhungin mi 30,000 an tling tawh niin AFP an hrilh.
Tun tum indona chhuak leh hi kum khat dawn liam taa M23 helten DR Congo khawchhak lama khawpui lian pahnih, Goma leh Bukavu an lak hnua chhuak thar leh a ni.
M23 hi US hmalaknaa inremna siampuinaah an tel lo va, Qatar kaihhruainain DR Congo sorkar nen a hrangin an inbe tawh thung.
Rwanda chuan DR Congo leh Burundi hi ramri bul khuate bomb-ah puhin civil mi 1,000 chuang an tlanchhe tawh tih an sawi ve bawk.
DR Congo khawchhak lam hi kum 1994-a Rwandan suat an nih atang khan buainain a tuam reng a. Kum 1990 chho vel atang khan inremna tam tak siam ni tawh mah se a taka kalpui a awm thei lo.
Hel pawl tam takin thuneitu zawk nih inchuhin an indo reng bawk a ni.
US inrawlh mah se DR Congo-ah helten khawpui la zel
