Ukraine-in a ngen chunga thla tam tak an tihhlawhtlinsak duh loh hnuah US leh Germany chuan Ukraine hnenah tank thawn luh an tum ta tia sawi niin hei hi Kyiv chuan indonaa danglamna siamtu tur tia a sawi a ni.
US President Joe Biden administration hian Ukraine hnenah hian M1 Abrams tank 30 vel a thawn dawn nia sawi a ni a. German Chancellor Olaf Scholz pawin Leopard 2 tank 14 a thawn lut dawn tia sawi a ni bawk.
US-a Russia ambassadror chuan ‘intihthinrim tum zual zelna’ tiin a sawi thung a. Ukrainian officials te chuan heng tank hmang te hian Russia awpna ata an territory an laklet leh theih tur thu an sawi thung.
A hma zawng chuan US leh Germany te chuan ram chhung leh pawn atanga an tank te Ukraine a thawnlut tura an nawrna chu an la hnawl char char a ni. Washington chuan high-tech Abrams tanks te enkawl tura training neih ngai nasa leh enkawl hautak tih chu chhuanlamah a nei a. Berlin thung chuan Nato chu Russia nena indo anga ngaihna a duh lo a ti thung.
US media te chuan Abrams tank thawnluh tur chungchang hi sawi chian vat a nih tur thu sawiin 30 tal Ukraine hnenah pek a ni dawn tiin a sawi a. Mahse, engtiang chiahin nge inpek tur tih te erawh hriatchian theih a la ni lo.
Hei bakah hian US media-te chuan German officials ten US-in M1 Abrams Ukraine hnenah a pe ngei tih a chian hnuah chauh Leopard 2 tank te chu Ukraine hnenah an pe ang an ti bawk.
“Germans tena Americans lamin Abrams Ukraine hnena an pek hnuah chauh Leopard an pek chauh dawn an ti a nih chuan Abrams chu kan pe mai tur a ni” tiin Democratic Senator Chris Coons chuan a sawi.
Britain chuan Ukraine hnenah Challenger Two tank te a thawn luh tur thu a lo puang chiang tawh a.
Poland chuan Ukraine hnenah leopard 2 tank te chu thawn luh a duh a, mahse, Germany-a siam a nih avangin Berlin remtihna a nghak tiin a sawi bawk.
European leh Nato ram 16 vel te chuan Leopard 2 tank hi an nei niin International Institute for Strategic Studies te chuan an sawi a. An vaiin Ukraine hnenah tank an thawn vek dawn tihna a ni lo chungin Sholz-an thutlukna a siam hnuah chuan an duh chuan tank an pe ve thei tihna a ni nghal thung.
German sorkar chuan official in engmah sawi a la nei lo chungin a chiang tawh anga ngaih niin Marie-Agnes Strack-Zimmermann, liberal FDP party, defence committee, German parliament chuan, “Thutlukna siam harsa tak leh hun duh rei tak a ni a, a tawpah chuan lohtheihloh a ni,” tia sawiin Ukrainian mipui dena awm rengte tan thu lawmawm a ni, a ti bawk.
A hma pawhin German Defence Minister Boris Pistorius chuan ram dang Leopard 2 tank an hnen atanga leite chu Ukrainains te puih nana an thawn lut duh a nih chuan an remtih thu sawiin mahse German berin a thawn lut dawn em tih erawh a sawi lo thung.
Ukrainian president’s chief of staff, Andriy Yermak chuan tanks te chu Russia laka hmanrua pawimawh a nih thu sawiin, “Kum 1991 Ukraine border humhim nan tanks te hi pawimawh tak an ni,” tiin a sawi.
Anatoly Antonov, US a Russian ambassador thung chuan US tena tank an supply a nih chuan Russian Federation runluih tumna nasa tak a ni ang, a ti ve thung.