US chuan Inrinni zan khan Iran a kap leh a, sipai thuneitute chuan tuipui kama mi an thlithlaina hmun leh air defence hmunte an bei tih an sawi.
US Central Command (Centcom) chuan Iranian sipaite thil tam tak an kap tih a sawi laiin Iranian sorkar chanchinbu pawhin Strait of Hormuz-a Qeshm Island kah a ni tih a puang.
Centcom hian Zirtawpnia Jordan beihnaa US sipai pahnih thihna leh pakhat chin hriat lohva awm mekna chu Iran-a Revolutionary Guards (IRGC) tihah a puh.
Iran-a sipaite chuan an ram beihna chhan let nan drone hmangin Kuwait-a US base pahnih an kap ve tih sorkar chanchinbuin a tar lang.
US leh Iran hi tun hnaiah an inbei nasa hle a, vantlang mamawh thilte inkahsakah an inpuh tawn mek bawk.
Inrinni khan Iran chuan Kuwait-a American sipaite hmun pawimawh tak, Camp Udairi leh Al Salem Air Base chu ‘kamikaze drone thahnem tak hmangin’ an bei niin IRGC hnuaia Tasnim news agency chuan a sawi.
Centcom chuan a zawna zan riat nana US chetna chu ‘Strait of Hormuz-a sumdawng lawng kalte a tihhlauhthawn theihna tichhiatna tura duan’ a nih thu a sawi.
An chetna chu ‘nizana Islamic Revolutionary Guard Corps-in Jordan-a American sipaite an beih avanga awmze nei taka a hremna pekna’ a nih thu a tar lang bawk.
Chawlhkar khat chhung an inkah tawh mek laiin Washington chuan Iranian lawng chawlhna a khar a, Tehran pawhin Strait of Hormuz an khar bawk a. A hma lawka inkahhai an puan chuan thla khat pawh a daih lo.
Inrinni chawhma khan Centcom chuan, “Jordan-a US service member pahnih chu US Central Command (Centcom) leh an thawhpui sipaite nen Iranian ballistic missile leh drone beihna an lo chhan letnaah an thi a. Service member pakhat chin hriat a ni lo bawk,” a ti.
Heng mite nen hian indonaa US lam thi hi 16 an tling ta a, tun thla tir khan American Navy pilot chu a bo hnuah a thi tih finfiah zui a ni.
Iran-ah erawh chawlhkar thum chuang kal ta chhunga US beihna avangin mi 50 vel an thi tawh a, mi 500 chuangin hliam an tuar bawk niin anram health ministry chuan a tar lang.
US leh Iran hi vantlang thil beiah an inpuh tawn a. The US chuan phain Iran-in lei leh power station-te beih a nih hnuah ‘sipai hmun chauh’ an kah thu an sawi.
Inrinnia Kuwait-in power plant leh tui tihthianghlimna hmun kah a ni tih a sawi hnuah Gulf Cooperation Council chuan Tehran chu vantlang thil beiah a puh.
Vantlang thil beih leh civil mite beih hi dan lo a ni a. Hetih lai hian lei leh power plant ang chi chu hmelmaten indona atana an hmang a nih erawh chuan kah phal a ni.
Washington leh Tehran hian June thla khan inremna an siam a; mahse, chawlhkar rei lo te hnuah chhe nghalin President Donald Trump-a chuan July 8 khan inremna ‘a tawp’ tih a sawi.
Inrinni zan khan Iranian Supreme Leader Mojtaba Khamenei-a chuan ziaka thuchhuah a siamah America-in inremna ‘vawi tam a bawhchhia’ tih sawiin ‘US hming ziah pawh engmah a ni lo’ tih a tar lang.
US leh Iran inkap zel, Jordan-ah US sipai pahnih thi
