Daily Newspaper

US mipui ten Covid-19 vaccine dawng tan dawn

8

US mipui te chuan vawiin atang hian Pfizer/BioNTech coronavirus vaccine chu an la thei dawn ta a, emergency-a hman atan thuneitute chuan an pawm fel tawh a ni.

Vaccine first dose maktaduai thum te chu state tinah sem darh tan a ni ang tiin Gen Gustave Perna vaccine semdarh buaipuitu chuan a sawi a.

He vaccine hian Covid-19 laka himna 95% neiin US Food and Drug Administration (FDA) chuan a him tia an ngaih a ni a. Hetihlai hian Inrinni khan US-ah Covid-19 avanga nunna chan 3,309 lai awmin ni khat thil thua nunna chan tam ber a ni bawk. Coronavirus avanga US a nunna chan hi November atang khan an pung hluai a ni.

Kar kalta Zirtawpni khan thuneitute FDA te chuan emergency a hman atan Pfizer/BioNTech vaccine chu an lo pawm fel tawh a ni.

UK pawhin he vaccine hi mipui nawlpuite hnenah a pe chhuak tan tawh bawk.

Gen Perna chuan US sorkar chuan vaccination campaign Operation Warp Speed chu chak taka a kalpui thu sawiin vaccine te hi darkar 24 chhungin him takin an thlenna hmun turah dah vek hman a nih tur thu a sawi a.

“Thawhtanni atangin hmun 145 ah pek chhuah tan a ni ang a, Thawhlehni atangin hmun 425-ah pek chhuah ni dawnin nilainiah hmun 66 ah pek chhuah a ni bawk ang,” tia sawiin a tirah mi maktaduai thum te hnenah pek phawt an nih tur thu a sawi bawk.

Gern Perna chuan heng vaccine te hi him takin an tum ram thlenpui a nih theih nan hma an lak zui zel tur thu a sawi bawk a. Mahse, American tin tena vaccine an lak theih vek hma chuan an chawlh loh tur thu a sawi bawk.

Pfizer vaccine te hi UK, Canada, Bahrain leh Saudi Arabia te pawhin an pawm fel tawh a. US chuan health worker te leh care home a cheng te hnenah an pechhuak hmasa ber phawt dawn a ni.

American nawlpui te highest-priority group pawna mi te chuan January thlaah an dawng hman chauh tura ngaih niin a nawlpuite chuan April thlaah an dawn hman rin a ni bawk.

Pfizer/BioNTech vaccine te hian mRNA vaccine hmangin pandemic virus genetic code siam danglamin taksa chu Covid-19 do tur leh immunity chhekkhawl turin a zirtir a ni.

Mihring taksa a vaccine chiuluh a nih veleh taksa chuan spike protein copy pe chhuakin chu chu natna thlentu ni lovin immune system te Covid-19 do tur siamtuah a tang ta a ni.

Vaccine hi tum hnih pek tur niin tum khat pek atanga ni 21 hnuah a tum hnihna pek leh tur niin a tum khatna pek hnu hian immunity insiam nghalin a tum hnihna pek hnu ni sarihah a nih tur ang a ni thei ta thin a ni.

Vaccine te hi temperature hniam taka dah ngai niin hei tak hi semchhuah vela harsatna thlentu a ni thung a. Sem chhuahna lamah pawh shipping container a bika siam hmanga semchhuah ngai a ni.

Pfizer te chuan nakum March thla hmain US ah 100 million dose an pek hman tur thu an sawi bawk.

Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy