Union Commerce Minister Piyush Goyal-a chanchinbuten India-in sumdawnnaa inremna siam tura US-in a dawrna a hnawl nia tar lan chu a dik lo tih a sawi a, ‘a dik lo chiang bal a, tanchhan nei lo, mi hruai kawi thei’ a ni tih a sawi.
Chanchinbua langte sawi fiahin Thawhtanni khan Goyal-a chuan June thlaa US Trade Representative Jamieson Greer-a’n New Delhi a tlawh tumin ‘inkawmna hlawk tak’ an nei tih a sawi.
“Thu dik lo vek a ni a, tanchhan nei lo leh mi tibuaitu a ni a. June thlaa Delhi a tlawh tum khan USTR Jamieson Greer nen kan inhmu a. Ram pahniha sumdawnna, lo neitute, hnathawkte leh consumer-te tana hlawkna hmuh theih thlen thei tur inremna siam tura an inpekna nemnghet leh a ni a. Kan team-te hi he thil tum tihhlawhtlinna kawngah hian an theihtawp an chhuah vek a ni,” tiin Goyal sawi.
Commerce Secretary Rajesh Agrawal-a pawhin thuthar lakhawmtute a kawmnaah India leh US inkara insumdawn tawnna thuthlung siam tum chungchanga inbiaknaah hmasawnna a awm zel tih a sawi.
Inremna tura ruangam awm mek sawihona chu tha taka kalpui niin kumin kum tira US-in chhiah lak dan tur a puan hnua thil thleng chu ram pahnihte thunun theih loh a nih thu a sawi.
Agrawal-a chuan, “Inremna hi siam a ni tep tawh a, a hun dik takah a thleng dawn a ni,” a ti a, India leh US hian an beisei dan chu an inhriatthiam tawnna a ni a, ‘harsatna awm lo’ an duh tih a sawi.
India leh US hi free trade agreement siam tumin an indawr rei tawh hle a. Tunah hian inremna atana ruangam duang fel tawhin hei hi sawiho mek a ni a, sorkar pahnih chuan tihfel tep a ni tih an sawi ve ve tawh a ni.
Hetih lai hian Indian chanchinbu thenkhatin inremna hi la hnai lo leh siam harsa tur ang hawiin tun hnai khan thu an chhuah a ni.
US nen inremna tura media-a langte a dik lo – Trade minister
