US Open khel lo tur Nadal

US Open khel lo tur Nadal
August ni 26 atanga United States Tennis Association (USTA) Billie Jean King National Tennis Center, New York-a khelh tan tur US Open-ah Rafael Nadal kan hmu dawn lo a, September thla nawi lama khelh tur Laver Cup lamah ram tana inlan a tum tih a sawi.
Kum khat chhunga grand slam tournament hnuhnung bera Nadal inhnuhdawh chhan hi a fitness-in duhthu a sam loh vang bawk a nih thu X kaltlangin a nemnghet.
Kum 38 mi Spaniard hian US Open title pali la tawhin, a hnuhnungber chu kum 2019 kha a ni a, kumina a inlan theih leh tak loh tur thu a tihchian leh tak avangin a zawnin kum hnih teh meuh final Grand Slam a inlan dawn ta lo a ni.
“NYC Ashe hmuna zan lam inkhel special tak kha ka chhim leh thei dawn ta lo a, kumin hian ka fitness-in 100% a kai zo lo leh tlat a a ni,” tiin a inhnuhdawh chhan a sawi a, thla thar September ni 20-22 chhunga Berlin lama khelh tur Laver Cup khel turin a inbuatsaih tih a tarlang tel.
Grand Slam title 22 la tling tawh chunga hliam neuh neuh vanga major title la chhunzawm thei ta tlat lo Nadal hi Paris Olympics-ah khan singles leh doubles-ah a chhuak ve ve a, singles competition lamah champion zui ta Novak Djokovic hneh loin second round-ah a tlawm a, Carlos Alcaraz nen doubles-ah inkawpin rin k ai teh mah se quarter-final an paltlang zo lo.
Chutiang miin Flushing Meadows-a inelna a hmachhawn thei lo leh tur chu an ngai hle dawn tih US Open Tournament Director Stacey Allaster chuan thuchhuah siamin a sawi a, “Rafa hi champion ropui niin, 2024 US Open-a a inlan thei lo tur hi fans leh he tournament nena inzawmna nei zawng zawngin kan ngai hle dawn a, USTA Billie Jean King National Tennis Center-a a kir leh ngei theihna’n duhsakna kan hlan e,” tiin.
Hliam vanga kum hnih chhung zet a a talbuai tak hnuah world number one hlui Nadal hi ATP ranking lamah 159-na a ni duai tawh a, kumin Olympics-a Djokovic laka 6-1, 6-4-a a tlawmna kha a career-a a tlawm chian berte zinga mi a ni.
Kumin January thla Australian Open-ah tihrawl thler avangin a tel thei lo a, May thla khan khelmualah kirlehin, French Open first round a paltlang zo lo.
Paris Olympic Games atana inbuatsaih a duh avangin Wimbledon atangin a inhnuhdawk a, a ropui thinna Paris clay court-ah ram tan Olympic gold medal a beisei a, mahse, French Open title 14 tehreng a lak tawhna Roland Garros-ah medal hlawhchhuak zo lo zawngin a zuih!
British number two Cameron Norrie pawh Olympics-a a chhuah theih lohna chhan ban na avang bawk khan US Open atang hian a inhnukdawk fel ve tawh bawk.
Kum 28 mi Norrie hian chawlh rih a la duh thu leh a ban nain ngai a awh leh theihna’n hahdam rih a duh thu Instagram kaltlangin a sawi.
Andy Murray a chawl tawh a, Norrie a inhnuhdawh leh tak hnu hian Jack Draper leh Dan Evans chauh chu New York main draw-a British mipa kan hmuh tur awmchhun an ni.