US Open mixed doubles-a inkawp tur Sabalenka leh Djokovic

US Open mixed doubles-a inkawp tur Sabalenka leh Djokovic
World number one Aryna Sabalenka leh 24-time Grand Slam champion Novak Djokovic an thawkdun dawn a, U.S. Open mixed doubles championship-ah an inkawp dawn tih Thawhtanni khan organiser-te’n an puang.
High-profile pairing an tih zingah Iga Swiatek leh Casper Ruud, Elena Rybakina leh Taylor Fritz, Naomi Osaka leh Kei Nishikori-te’n mixed doubles an chuh ve bawk ang.
US Open lam hian nikum atang khan kalphung thar an zawh a, mixed doubles event-in ngaihhlut a hlawh lehzual beiseina avangin singles main draw tan hmain mixed doubles event an khelh zawhtir a; kuminah pawh he ti ang bawk hian an kal leh dawn a, thla thar August 24-26 chhung hian mipa leh hmeichhe tangdun inelna an khel dawn a ni.
He ti a nih chuan singles player tha thate’n mixed doubles event title an chuh ve leh thei dawn a, inkawp tur thenkhat pawh a chiang tawh a ni.
Tunhma lam kha chuan singles lama insawrbing an duh avangin top player-te khan mixed doubles lam hi an hawi hlei thei lo a, player tha tha an tel loh thin avangin he championship bik hian grand slam tournament-ah pawh ngaihhlut a hlawh nep deuh lo thei lo a, tunah chuan singles main draw khelh hmaa zo fel turin ruahmanna an siam thar a, Sabalenka leh Djokovic inkawp pawh hmuh tur a awm dawn ta a ni.
An format duan thar chu 16-team main draw niin, pair (team) 16 in-el tur zinga team paruk chuan qualifying an khelh phawt a ngai dawn a, a dangte chu combined singles ranking atanga teh tur niin, wildcard pariat pek chhuah tur ni bawkin, eight-team qualifying draw an siam thar kaltlangin team hnih an inhlangkai leh dawn a ni.
He kalphung thar hi nikum atanga hman tan niin, sumdawnna lamah US Open-in a hlawkpui a, ticket pawh an hralhchhuak tha a, top singles player-te paw’n an bawh zui ta zel a ni.
Singles khelh hmaa mixed doubles an khelh tak avangin doubles specialist-te tan chance a chhe ve thung a, doubles specialist ni ve chiah lem lo, mixed doubles khel ve hrim hrim tan phei chuan beiseina a chau lehzual a, hei vang hian doubles specialist-te chuan he kalphung thar hi an sawisel reng a ni.
Tarlan tawh angin, six-times Grand Slam winner Swiatek leh Ruud, world number two Rybakina leh Fritz, Osaka leh a chipui Nishikori, Jessica Pegula and Jack Draper-te bakah defending champions Sara Errani leh Andrea Vavassori-te an inkawp dawn.
Serbia superstar Djokovic hi kum 39 mi ni tawhin, a kawppui tur Belarusian Sabalenka hi kum 28 mi a ni thung.
New York tournament-ah hian British number one hlui Jack Draper pawh American Jessica Pegula nena inkawp leh turin a inbuatsaih mek a; anni pahnih hian 2025 semi-final an lo thleng tawh a; Poland nula Swiatek leh Norway tlangval Casper Ruud-te pawh nikum khan inkawp tawhin, US Open mixed doubles-ah hian runners-up an ni nghe nghe.
Mipa lama top player pahnih Carlos Alcaraz leh Jannik Sinner-te erawh mixed doubles-ah hian an inhambuai ve dawn lo thung.
Spanish seven-time major champion Alcaraz hi nikum khan Britain star Emma Raducanu nen Flushing Meadows-ah an inkawp a, kumin erawh a banrek na avangin singles lam bak a ngaihtuah thei dawn lo niin a lang a, singles inelna bikah chuan Cincinnati Open chu a kirlehna atana a tinzawn a ni mek thung.
Thla hmasa maia Wimbledon title la chunga major title panga la tling ve ta Italian Sinner hi chuan nikum pawh khan mixed doubles hi a khel lo ve hrim hrim a; tunlai hian a hriselna dinhmun a veng uluk mek a, US Open inbuatsaihna hmasa Canadian Open atang pawhin a inhnukdawk tawh.
Thla hmasa khan 23-time major singles champion Serena Williams chu Wimbledon-ah rawn comeback mah se khup hliamin a tihbuai leh tak rih avangin a laizawn Venus nena doubles inelna hmachhawn a tum pawh a thulh ve ta bawk.