US chuan Ukraine chu Russia nena an indonaah ‘a tul chhung a pui dawn’ tiin US President Joe Biden chuan sawi lawk awm hauh lova Kyiv a tlawhnaah a sawi.
“Hnehna in chang dawn a ni tih hi kan ring tlat a ni,” tiin Biden chuan a sawi a.
Biden hian Ukraine hi Russia in Ukraine a run kum khatna thlen hma deuh chiahah a tlawh a ni.
Biden chuan Russian President Vladimir Putin chu Russia-in Ukraine leh Western ram te khum thei mai tura a inngai chu ‘a tisual chhiava a ni’ tiin a sawi bawk.
Ukraine President Volodymyr Zelensky nena inbiakna nei zuiin an pahnihin Russia-in Crimea a chhuhsak atanga Ukraine sipai nunna chan tawh te hriatrengna hmun te an tlawh dun a.
Biden-an Kyiv a tlawh hi America-in Ukraine democracy, sovereignty leh territorail integrity humhim a tumna langsar taka lantirna a ni tiin White House thuchhuah chuan a tarlang.
Biden hian Kyiv thleng tur hian a rukin Poland atangin darkar 10 lai relin a kal a. Russia chu President Biden-an Kyiv a pan hma darkarah a pan tur thu hrilhlawk a ni tiin US official te chuan an sawi.
Biden-an Kyiv a tlawh hnuah US Secretary of State Antony Blinken chuan Ukraine hnenah tanpuina $450 million hu pek a nih tur thu puang nghalin heng zingah hian howitzer leh Himars rocket system te bakah Javelin missile leh air surveillance radar te pawh a tel a ni.
Hei bakah hian US chuan Kyiv hnenah Ukraine energy infrastructure thuam that nan a hranpain $ 10 million emergency assistance a pe dawn bawk.
Tunkar chhung hian Russia war machine te chawmtu ber nia ngaih mimal leh company te chu US chuan a hrek zui dawn bawk.
Zelensky chuan Ukraine-in Russia laka hnehna a chan theihna chhan tur chu tumruhnaah a innghat tia sawiin chu chu Biden-a ah a hmu tiin a sawi bawk a.
“Tunah hian Ukraine ah khawvel order, rules, behchhan leh humanity behchhan chu tihchianin a awm mek a ni,” tiin a sawi.
Zelensky chuan ram pahnih hruaitute chuan ralthuam dang thawn luh pawh an ngaihtuah tiin a sawi a. Zelensky hian US hnenah F-16 fighter jets a dil chamchi a, mahse, US leh an thawhpui ram dangte chuan pek an la remti mai thei lo a ni.
Biden a zin chungchangah Russian foreign ministry thupuangtu Maria Zakharova chuan hlawhchhamna chu ‘an thlarau Americans te hnena hralhtu’ te chungah a tla ang tiin a sawi thung.
Tun hi indona thlen hnua Ukraine tlawhtu ram hruaitu langsar ber niin chhinchhiahtlak bera ngaih a ni bawk a. President Biden leh Zelensky tena central Kyiv a St Michael’s Cathedral chhunga an awm laiin siren tihrik a ni nghe nghe a ni.
Khawvel ram hruaitu dangte pawhin Ukraine hi an tlawh tawh tho chungin US presient ber indo laia Kyiv a tlawh hian leh indonaa tel ve na nei bawk si lo a nihna chuan Khawthlang ram tena Kyiv an thlawpzia a pholang zual nia ngaih a ni.
US hi Ukraine thawhpui leh thlawptu lian ber niin US state department chuan Ukraine hnenah hian military assitance $ 24.9 billion hu a pe tawh a. January thla khan Biden chuan US chuan battle tank Abrams 31 leh longer-range missile a pek tur thu a lo puang tawh bawk.
A ruka zinna
White House official te chuan Joe Biden-an Ukraine capital Kyiv a tlawh chu ‘tunlai huna thil thleng ngai lo’ tiin an sawi a.
A hmaa US president tena indona hmun Iraq leh Afghanistan an tlawh te chu US sipai tam tak awmsana a ni, an ti a.
Biden hian Poland a tlawh pahin Kyiv a pan mai ang tia ngaihdan chu a awm chungin a tlawh tak tak chuan mi tin a barakhaih tia sawi a ni bawk.
“Zin kawng hlauhawm a ni a, tute pawin chu chu an man thiam vek a. Joe Biden hian leader a nih angin huaisen takin hma a la a ni” tiin White House communication director Kate Bedingfield chuan a sawi.
Biden zui tur hian journalist pahnih chauh thlan an ni a, anni pawh thuruk vawng tura rinawmna thutiamtir thlap niin an mobile phone te pawh laksak niin Biden an Kyiv a thlen hma chuan report engmah an siam remtihsak an ni lo bawk.
Kyiv pan nan darkar 10 zet rel-ah chuangin Ukraine ram a luh hrim hrima duhtawk thei a nih rualin Kyiv khawpui ngei hlen a duh tlat bawk a ni.