American Idol winner a nih hnua rimawi khawvela hming chher zui ta, country superstar Carrie Underwood chuan US President 47-na, Donald Trump lak luhnaa ‘America the Beautiful’ tih hla a capella-in a sa a, Underwood hian a profesional zia tilangin, fak a hlawh le a ni.
US Capitol Rotunda-a president lak luh inkhawmah hian Trump an lak luh hnua a presidential speech zawhah Underwood hi zai tura koh luh a ni a, The Armed Forces Chorus leh United States Naval Academy Glee Club te nena zaiho tura tih ni mah se technical lamah harsatna an tawk a, Underwood hian a hângin, amah chauhin he hla hi a sa ta a ni.
Underwood hi zai tura an koh luh tawh hnuah technical lama harsatna a awm avangin minute hnih vel zet zai thei loin a ding ngawi reng a, a tirah rimawi a rawn ri zuai a, mahse a tawp zui ta daih a, Carrie Underwood hi technical lama harsatna an neih thu an hrilh hnuah a hângin a zai ta a ni.
Underwood hian a zai hmain, “A hlathu inhriat vek kha, min lo zawm ve rawh u aw,” tiin American patriotic anthem ‘America the Beautiful’ tih hla chu a capella-in nalh zetin a thlawh ta tho a ni.
Hetiang event lian, khawvelin a thlir thup laia technical lama harsatna lo awm hian sawi a hlawh zui viau a, chutihrualin talbuai mai lova Carrie Underwood-i mahni inringtawk taka a hâng a pui taka a zai zui thei mai chuan fak a hlawh tak zet a ni.
US President lak luhnaah meuh pawh technical lama harsatna a thleng karah Underwood-i’n ‘America the Beautiful’ a capella-in a sa
