US-Russia inbia, Moscow-in Ukraine-a Nato sipai dah duh lo

US-Russia inbia, Moscow-in Ukraine-a Nato sipai dah duh lo
Russian Foreign Minister Sergei Lavrov chuan Saudi Arabia-a US nen an inbiak hnuah Ukraine-a Nato sipai peacekeeping force dah chu eng inremna hnuaiah mah an pawm dawn lo tih a sawi.
“Flag dang a nih mai vanga sipai tho dah hian engmah a tidanglam dawn chuang lo. Kan pawm lo hulhual a ni,” a ti.
Russia leh US hian indona titawp tura inbiak erawh an remti ve ve thung.
“Vawiin hi zinkawng thui leh rei tak atana bul tanna leh pawimawh tak a ni,” tiin US Secretary of State Marco Rubio chuan Thawhlehnia an inkawm zawhah a sawi.
Inbiaknaah hian Ukraine sawm an ni lo va, President Volodymyr Zelensky-a pawhin ‘mak’ a tih thu a sawi.
Riyadh-a inbiakna hi Russia-in thapuia Ukraine a rûn hnua Russian leh American palaite hmaichhana an inbiakna hmasa ber a ni.
Saudi Arabia-a inbiaknaah hian US Middle East envoy Steve Witkoff leh US National Security Advisor Mike Waltz pawh an tel a, Russian president thawhpui, Yury Ushakov leh Russia-a sovereign wealth fund hotu, Kirill Dmitriev te pawh an tel.
An inbiak zawhah Lavrov-a chuan US leh Russia chuan ambassador ruat ve ve rentiin a thawhhona chu ‘a ngai anga siam’ leh turin a hma thei anga chet ni se an ti tih a sawi.
“Inkawmna hlawk tak a ni a, tute pawh kan ingaithla a, kan inhrilh vek a ni,” a ti.
A hmaa Russia lo dinna ni reng tawh, Nato tihlen leh Ukraine-in a zawm an duh lohna chu la ngai rengin Russia tan ‘vauna chiang tak’ a nih thu a sawi bawk.
Rubio erawh chuan Russia chu ‘a hmin’ nia sawiin ‘buaina hmet mit tura kalpui tumna a nei’ niin a sawi.
“A khawi lam mah mah ngaihhnathiamna awm lovin, a nih ang angin kan kal rih a ni,” a ti.
Europe hruaitute pawh Thawhtanni khan Russia leh President Donald Trump-a kaihhruai US inhnimhnaih thar sawi hian Paris-ah an thukhawm a, an dinna chiah erawh a la chiang lo.
UK Prime Minister Sir Keir Starmer chuan Ukraine indona titawpa inremna awm turin ‘US chetna’ a ngai a, chu chu Russia-in a thenawm a beih nawn tawh lohna tur a nih thu a sawi a. Kyiv-a UK sipai dah pawh a pawi ti lo tih a sawi.
Hetih lai hian Nato-a tel, Germany Chancellor Olaf Scholz chuan Ukraine-a sipai dah tura thutlukna siam tur chuan ‘a la hma tak zet rih’ tih a sawi ve thung.
Poland Prime Minister Donald Tusk chuan sipai thawn luh chu tul ber lova a ngaih thu a sawi a, Trump-a lak luhnaa European hruaitu tel awmchhin, Italy Prime Minister Giorgia Meloni-i pawhin sipai dah ngawt chu a la dik chiah rih lo niin a ngai bawk.
Paris-a an thutkhawmnaah hian European sipai tirh luh chu Ukraine-a muanna a awma a him theihna turin a thawh hlawk tam dawn lo nia a ngaih thu a sawi a ni.
Riyadh-a inbiaknaah hian Rubio chuan European Union chuan ‘hrekna leh hremna tam tak a kalpui mek avangin ngaihtuah tur tam tak a nei dawn’ niin as awi.
Ukraine a tel ve loh chungchangah chuan ‘tute mah a kila dah bik an awm lo’ niin a sawi.
“He buainaa tel ve zawng zawng chu an lo tel ve a rem vek a, kan pawm vek a ni,” a ti.
Ukrainian hruaitu, Zelensky-a erawh chu inkawmna neih lai hian Turkey-ah thuthar lakhawmtute kawmin sawm a ni lo chu mak a ti hle tih a hriat theih.
“Engkim fair taka tih vek kan duh a, tute mahin min hnungchhawnin thutlukna an siam lo vang,” a ti.
“Ukraine indona titawp tur hian Ukraine tel lovin thu i titlu thei lo vang,” a ti bawk.
Riyadh-a inbia American leh Russian hmela nui hmel awm chu thil tirinhlelhawmtu nia a ngaih thu sawiin, chutih rual chuan a khawih theih bak piah lamah chuan engmah tihdanglam theih a nei chuang lo tih a sawi.
Ukrainian president hian an ramin anmahni beitute lo hneh chu sawi loh, lo dan ringawt pawh American puihna tel lo chuan a harsa hle tih a hria tih a sawi bawk.