US sipai an thlen belh mek laiin Iran-in a lo nghah thu sawi

US sipai an thlen belh mek laiin Iran-in a lo nghah thu sawi
Iran-a parliament speaker chuan a ram sipaite chuan US sipai 3,500 dangin Middle East-a an thlen leh mek laiin ‘American sipaite chu an lo nghak reng’ tih a sawi.
Mohammad Bagher Ghalibaf-a chuan Iran ram chhunga US sipai luh tum apiangte chungah Tehran chuan ‘mei ruah a surtir’ dawn tih a sawi.
US Central Command chuan X-ah chuan lawng sipai leh marine lut tharte hi indo lawng lian, USS Tripoli kaihhruai unit-a tel an nih thu an sawi a, heng zingah hian ral bei chi leh bungrua pawh a tel.
Middle East-a American sipai an thlen belh lai hian Washington Post chanchinbu chuan Pentagon chu Iran-a chawlhkar eng emaw zat khawmuala beihpui thlak turin a inbuatsaih tih a tar lan laiin a ni a. US thuneitute erawh chuan leiah sipai dah an nih dawn leh dawn loh an la sawi chiang lo.
Iranian sorkar chanchinbuin a thuchah a tihchhuahah Ghalibaf-a chuan ‘hmêlmate hian mi hmuhah chuan inbiakna lam a hawi a, a rukin khawmuala che turin a inruahman thung’ a ti.
Indo tawp hun tur chungchangah US President Donald Trump-a chuan thil hrang hrang a sawi a. Tun hnaiah a tawp hnai tawh thu a sawi rualin energy chungchang telin Iran laka hma lak belhna tur lam a ngaihtuah thu a sawi tel tho bawk.
Chawlkar liam ta tir lam khan US chanchinbute chuan Trump-a sorkar hian Congress hnena Iranian sipai laka beihpui thlak mek atana hman tur emergency funding $ tluklehdingawn 200 dil turin a inbuatsaih niin an tar lang a, hei hian indona hi chhunzawm zel a duh tih a tilang nia ngaih a ni.
Trump-a hian kar hmasaa Oval Office-ah thuthar lakhawmtute a kawmnaah Iran-ah khawmuala che tur sipai a tirh loh thu a sawi.
Hetihlai hian Secretary of State Marco Rubio-a chuan Zirtawpni khan US chuan khawmual sipaite tel lovin indona a tumte a hlen chhuak thei tih a sawi a, chutih rual chuan Trump-a hi ‘kawng hrang hranga che tura a inpeih a ngai’ tih a sawi.
Washington Post chuan US thuneitute thu sawi tar langin White House-in a pawmpui khawmuala beihpui thlakah sipai pangngai leh Special Operations force inzawmkhawmte an tel ang a, beihpui thlak chu a tawp thuai dawn niin a tar lang.
Axios news agency pawhin Pentagon-in Iran laka ‘a tawp kharna chetna’ thlen theihna tur sipai duhthlan tur a siam mek niin a tar lang bawk a, hei hian khawmuala sipai chetna leh bomb hmanga beih pawh a huam thei bawk.
US hian Iran-a beihpui a thlakna kaihhnawihah Middle East-ah sipai hmanrua a lo chhawp nual tawh a. Heng zingah hian bomb thlaktu leh indo thlawhna bakah thlawhna phur lawng (aircraft carrier) leh missile kah thlakna hmuanrua pawh pawh a tel.
US Navy-a aircraft carrier changkang ber, USS Gerald R Ford chu Inrinni khan Croatia-ah siam that hna thawk turin a thleng a, lawnga kangmei chhuakah hian a khalhtuten hliam an tuar a, chhiatna nasa tak a thleng bawk.
US leh Iran inkarah hian remna zawnga inbiakna a awm tawh em tih pawh a la chiang lo va. Tehran chuan indawrna a awm lo tih hi a sawi a, Foreign Minister Abbas Araghchi-a chuan US nen hian palai kaltlangin thu an inthawn tawh tih a sawi a; mahse, heng hi ‘inbiakna emaw, indawrna emaw, chutiang chi thil emaw a ni lo’ a ti thung.