Australia leh New Zealand-a hmeichhe World Cup khelh mekah thawhlehni khan group D leh E a mite an inching fel a, champion lai USA an tlang hram laiin Portugal an tla thung. Group D-ah England in China an sawp a, group champion ni chungin last 16 an lut.
Group E-ah champion lai USA leh Portugal ten inkhel pawimawh an hmachhawn a, last 16 lut tur an zawng. Point li hmu tawh USA hian last 16 lut turin Portugal lakah tlawm an pumpelh a ngai a. An in draw a nih chuan last 16 lut tur zawk an ni. Point thum hmu tawh Portugal tan last 16 lut turin champion lai USA lakah chak ngei ngei an mamawh thung.
Chak mamawh zawk Portugal hian hnehna chan ngei tumin an khingpuite nawr thin mah se a hmawr an bawk fuh thei lova. goal an thun thei lo. Group champion nih beisei zui turin USA in chak ngei tumin tan an khawh ve bawk. Inkhel hmuhnawm takah hian hun tawp thlengin goal a lut thei lova, USA leh Portugal te hi goal awm lovin an inhnehtawk. USA lakah an chak zawh loh vangin Portugal an tla a, USA erawh Group E-ah pahnihna ni chungin last 16 an lut ve thung a. Group F champion an hmachhawn zui leh ang. USA hi hmeichhe World Cup awpbet mektu an ni a. World Cup 2023-ah hian champion in, a trophy kawl mek humhim tumin tan an khawh zui leh ang.
Group E-a inkhel dangah Netherlands chuan 7-0 in Vietnam an sawp ve thung a, point sarih hmuin Netherlands hi group champion an ni.
Dunedin Stadium, Dunedin, New Zealand-a inkhelah Netherlands hian Vietnam an ngam viau a, chawlhlawk hmain goal nga ngawt an thun hman. Inkhel tan atanga minute riatna lekah Lieke Martens chuan hmahruaina goal a thun a. Hmahruaina goal an thun atanga minute thum hnu lekah Katja Snoeijs chuan an goal hnihna a thun belh zui leh zat. Hma takah goal hnih an thun vangin inrintawkna sang zawk a pe a. Vietnam lakah tha zual zawkin an inlan zui.
Minute 11-na Katja Snoeijs goal thun hnu hian na takin an khingpuite an nawr chhunzawm a, goal pawh an thun leh thuai. Minute 18-naah Esmee Brugts chuan an goal thumna a thun a. Minute 23-naah Jill Roord chuan an goal lina a thun zui leh zat a. Chawlhlawk dawn hnaih minute 45-naah Daniëlle van de Donk chuan an goal ngana a thun zui leh a, si nga faia hmahruai chungin chawlhlawk an hmang.
Chawlhlawk hnu lamah Netherlands an khel tha chhunzawm a, goal hnih dang an thun belh leh. Esmee Brugts chuan minute 57-naah an goal rukna a thun a. Hun tawp dawn hnaih minute 83-naah Jill Roord chuan an goal sarihna a thun zui leh a. Khawchhak team lakah 7-0 ngawtin an chak a, Group champion an ni zui ta a ni.
Vietnam sawptu Netherlands hian group stage-ah tlawm an nei lova, vawi hnih chakin, vawi khat draw an nei. Khelh thum atangin point sarih an hmu a, Group E champion an ni. Group E atang hian Netherlands leh USA in last lut an lut a. Point li hmuin Portugal an tla a, khelh thum tlawm zawn Vietnam in point an hmu ve lo. Vietnam in vawi thum an khelah tlawm vekin point an hmu ve lo a, goal 12 zet an chhuah. Goal 12 ngawt an chhuah lai hian goal thun an nei ve lo thung.
England in China an sawp
Group D-ah point ruk hmu tawh England chuan 6-1 in China an sawp a, group stage-ah vawi thum an chak zawn a, group champion an ni.
Hindmarsh Stadium, Adelaide, Australia-ah England in China an ngam viau a, inkhel tan atanga minute lina lekah Alessia Russo chuan hmahruaina goal a thun nghal. Hma taka goal an thun hian inrintawkna sang zawk a pet a, phur zawkin an khingpuite an nawr zui theih phah. Minute lina leka hmahruaina goal an thun hnu hian minute 26-naah Lauren Hemp chuan an goal hnihna a thun. Minute 41-naah Lauren James chuan an goal thumna a thun zui leh bawk a, si thum faia hmahruai chungin chawlhlawk an hmang.
Chawlhlawk hnu lamah si thum fai hnufual tawh China inbul an tan tha ve thung a, minute 57-naah penalty an hmu. He penalty hi Wang Shuang chuan a pet goal a, an si phurh a sut then. China goal khatna a luh hnuin England tan Lauren James, Chloe Kelly leh Rachel Daly ten goal an thun belh zui leh a, Three Lions hi 6-1 in an chak zui ta a ni.
Group D-a inkhel dangah Denmark chuan si hnih faiin Haiti an hneh a, last 16 an lut ve bawk. Denmark tan hian Pernille Harder leh Sanne Troelsgaard ten goal an thun.
Group D-atangin vawi thum chak zawn England chu group champion an ni a, point 6 hmu Denmark chu pahnihna an ni. Group C-a pahnihna Spain an hmachhawn ang a. Denmark hian Japan an hmachhawn zui ve thung an
USA an tlang, Portugal an tla
