U.S. Commission on International Religious Freedom (USCIRF) chuan Central sorkarin Citizenship (Amendment) Act (CAA) kalpuina tur rules a tihchhuah chu sawiselin mi tute mah an sakhua emaw rinna avangin khua leh tui nihna hnarsak tur a ni lo a ti.
Sawisel hlawh Citizenship (Amendment) Act, 2019 (CAA) hmanna tur rules chu tun thla tirlam khan tihchhuah a ni a, he rules hmang hian Pakistan, Bangladesh leh Afghanistan ram atanga Muslim ni lo sakhuana thil tihduhdah tuarte chu India khua leh tui nihna pek an ni thei a ni.
“CAA hian thenawm ram atanga India rama luta inhumhimna dilnaah sakhuana thil chu behchhanah a hman a ni” tiin USCIRF Commissioner Stephen Schneck chuan a sawi.
Schneck chuan CAA chuan Hindu, Parsi, Sikh, Buddhist, Jain leh Kristian te khua leh tui nih dilna tichakin mahse Muslim te erawh an tel ve lo a ti.
Sawiseltute chuan sorkar chu he Act atanga Muslim te an telh ve lohnaah an sawiselna chu India sorkar chuan a chetlak dan chu a tan bur thung a.
“CAA hi khua leh tui nihna pekna a ni a, khua leh tui nihna laksak lam a ni lo. Ram nei lo te harsatna chinfelna a ni a, mihring zahawmna humhimin human rights a thlawp a ni” tiin External Affairs Ministry thupuangtu Radhir Jaiswal chuan a sawi a. CAA chu India ram chhung thil a ni tiin a sawi bawk.
India chuan tun hma pawhin USCIRF tena India human rights record an sawiselna pawh a lo hnawl tawh bawk.
Thuchhuah a siamah Schneck chuan, “Danin sakhuana thila tihduhdah tuarte humhim a tum takzet a nih chuan Burma atanga tihduhdah tuar Rohingya te, Pakistan-a Ahmdiyya te, Afghanistan a Hazara Shi’a te leh midang te pawh an tel tur a ni. Mi tute mah sakhuana emaw rinna avangin khua leh tui nihna hnawlsak tur a ni lo” tiin a sawi.
Mahse, India Home Ministry chuan heng ram atang hian Muslim te pawhin dan awmsa zulzuiin India khua leh tui nihna an dil thei tho a ti thung.
CAA rules te chu tihchhuah a nih tawh avangin Modi sorkar chuan Bangladesh, Pakistan leh Afghanistan atang December 31, 2014 hmaa sakhuana thila tihduhdah tuar non-Muslim te chu khua leh tui nihna a pe thei ta a ni.
CAA chu December 2019 daih tawh khan parliament ah pawm tawh niin president pawhin remtihna a pe nghal a, mahse, India ram hmun hrang hrangah duhlohna lantirna a nasa hle thung.
USCIRF chuan US Congress member te chu vantlang hriata India rama religious freedom issue te chu aupui turin a ngen a, India pawh sawipui tur leh congressional delegation te pawhin sawiho turin a ngen bawk.
USCRIF Commissioner David Curry chuan State Department chuan tun hnaiah fundmental democratic principles hnuaia community tin te chu religious freedom leh dan dan hnuaiah angkhata entur a ti a ti bawk.
“USCIRF chuan US sorkar chu Indian authority te nen human rights activist te hleihnei taka man te chhuah tur leh religious minority te rights humhim a nih theih nan kar turin a ngen a ni” tiin Curry chuan a sawi bawk.
India chuan USCIRF thu leh hla hmasa te pawh lo hnawl tawhin India chuan thudik famkim lo behchhan tia a hnawl thu sawiin USCIRF ngei pawh a hlutna a tidal a ti bawk a. Chumai bakah USCIRF chu India hrefiah tur leh a plurality leh democratic ethos te hrefiah zual turin a ngen bawk.
USCIRF hi independent, bipartisan federal government entity niin US Congress in a monitor, analyse reng leh ram pawna religious freedom report pe thintu a ni.
Hetihlai hian Foundation for India and Indian Diaspora Studies (FIIDS), India leh Indian Diaspora kaihhnawih policy studies, analysis, advocacy leh awareness kalpui thinte chuan an zirchiannaah CAA provision te chu India thenawm ram pathuma sakhuana thila tihduhdah tuarte khua leh tui nihna pekna tur liau liau an ti ve thung.
USCIRF in CAA sawisel na hle
