Boxing palian huanga kawnghren kawltu pahnih; Oleksandr Usyk leh Daniel Dubois te chu July thlaa inhnek turin an indawr a, inremna erawh an la nei fel thei lo.
Palian huanga boxer tha ber ni mek Usyk hian WBA (Super), WBO leh WBC kawnghren a kawlkhawm mek a. Daniel Dubois hian Usyk-a’n a kalsan tak IBFG kawnghren a kawl ve mek thung. Usyk leh Dubois te hi August 2023 khan an lo inhnek tawh a, Usyk hi knockout in a chak. He an inhnekah hian Dubois hian Usyk hi a hnek tlu hmasa a, inhnial theih takin Dubois hian a hnek hniam lutuk tih a ni ta thung. Chuti ni lo se Usyk hian a vawi khat nan palian huangah hneh loh a tawng ngeiin a rinawm. Usyk laka a tlawm hnuin Dubois hian inhnek vawi thum a hmachhawn leh tawh a, knock out in a chak vek nghe nghe a, palian champion a ni ta hial a ni.
Palian huangah inhnek vawi 23 hmachhawn tawha tlawm la nei lo Usyk hian Anthony Joshua leh Tyson Fury te vawi hnih ve ve an hneh leh tawh a, palian huangah kawnghren pali kawl khawm thei hmasa ber a ni hial. Kawnghren pali a kawl khawm hnuin Usyk hian Tyson Fury hmachhawn nawn leh a duh vangin IBF belt a kalsan thung. Ukranian boxer huaisen Usyk hian boxing chawlhsan hnaih a rilruk a, inhnek a chawlhsan hmain kawnghren pali kawl khawm leh zet a tum niin tarlan a ni. Kawnghren pali kawl khawm leh thei tur chuan IBF champion Daniel Dubois a hmachhawn leh phawt a ngai dawn.
IBF champion Dubois hian vawi khat a lo hneh loh tawh Usyk hmachhawn nawn lehin phuba lak ngei a duh a, mah se a tan Usyk hmachhawn a awlai dawn lo thung. A kawnghren kawl mek IBF belt humhim turin Derek Chisora hmachhawn tura rih a ni a. Chisora a hmachhawn lo a nih chuan a kawnghren kawl mek hlihsak a ngai hial mai thei. British boxer zingah palian huanga kawnghren pali kawl thei an la awm ngai lova, palian huanga kawnghren pali a awm hma khan Lennox Lewis chuan kum 1999 khan kawnghren pathum a lo kawlkhawm tawh. Dubois hian Usyk a hmachhawn thei a, a chak bawk a nih chuan British boxer zingah palian huanga kawnghren pali kawl khawm thei hmasa ber a ni thei dawn.
Usyk leh Dubois te an indawr
