Uttarakhand-a chhiatna thlennaah lei pawimawh dawh zo

Uttarakhand-a chhiatna thlennaah lei pawimawh dawh zo
Tun hnaia khuarel chhiatna lian tak a thlenna, Uttarakhand-a Uttarkashi kalpawhna turin Pathianni khan lei dawh zawh a ni a, hei hi thuneitute chuan ni nga chuang zet ni tin mamawh la lut thei lova awm tawh mipuite hnena mamawh leh puihna pekna atana tangkai tak a ni dawn tih an sawi.
Thawhlehni kal taa Uttarkashi-a Dharali leh a bul hnaia sabereka khuangkaih thlenga chin hriat lohte chu ui fing leh thermal imaging camera hmanga zawn hna la thawh zel a ni.
Chhiatna a thlen atanga ni rukna, Pathianni khan tangkhangte lak chhuah hna leh mi zawn hna hi thawh zel a ni a, khaw awm danin a zir loh avangin duh angin thawh chak theih a ni lo thung.
Heti chung hian helicopter hmangin tangkhang mi 177 chu lak chhuah hman niin mi 1,200 vel chhanchhuah an ni tawh.
District thuneitute chuan thi pali an chian tawh thu sawiin ruang pahnih an hmu tawh a, mi 49 chin an la hre lo mek.
Chief Minister Pushkar Singh Dhami-a chuan Pathianni khan Dehradun-ah State Emergency Operation Centre thutkhawm kaihruaiin chhiahna thlenna hmuna chhawmdawl leh chhanchhuah hna thawh dante an thlir.
Pathianni atanga hman tan feet 90-a thui Bailey bridge hi Gangotri National Highway-a dawh niin Gangnani leh Harshil inkalpawhna tur a ni a. Hetiang lei hi rang taka dawh theih chi a ni.
Indian Army leh Border Roads Organisation (BRO) ten khaw chhe tak hnuaiah a dawh hna hi thawkin engineer-ten an thutchilh bawk.
Kawngpui ber a chhiat avangin Harshil-Dharali kalna tur kawng dang pawh siam niin hemi hmang hian chhawmdawnna pawh thawn luh thin a ni.
Home Secretary Shailesh Bagauli-a chuan thuneitute hnenah Dharali-ah hian ni tin diesel litre 2,000 leh LPG cylinder pawh an chatlak lohna tura pe turin a hriattir.
Kawng chhiat chhung hian sakawr leh ransa dang hmangin ni tin mamawh chu phurh luh reng a ni bawk tih a sawi.
Bhagirathi lui lianin a lak avang leh lei min avanga Songad, Dabrani, Harsil leh Dharali-a kawngpui chhiate chu tihtlang tumin chhun zan zawma thawh a ni tih thuneituten an sawi.
Damdawi thiamte pawh chhiatna thlenna hmunah hian awmtir niin specialist doctor-ten an awmchilh a. Ei tur leh chhawmdawlna dangte chu Harsil helipad-ah Matli helipad atangin helicopter hmanga thiar luh a ni bawk.
August 7 atang khan chhanchhuah hna thawktin helicopter-te chu vawi 260 chuang an thlawk tawh a. Helicopter pariat bakah sipaiten Chinook, Mi-17, ALH-1 leh Cheetah helicopter thawh chhuahpuiin mi chhanchhuah nan an hmang.
SDRF-in tui thiamte nen mi zawn hna an thawk a. Chhanchhuah hna thawktute hian chhiatna thlen hma leh hnu thlalak atangin mi hi zawngin an hai nasa hle.
Thawhlehni atang khan mobile hmanga inbiakpawhna a chhiat avangin Dharali-ah hian satellite communication hub bun a ni bawk.
Harsil valley-ah tui lianin electricity ban, hrui, transformer leh sub-station a tihchhiatte chu siam that tawh niin Pathianni atang khan hmun tam zawkah power an pe leh tawh.