Daily Newspaper

Vaihlo – Hmuam/Ei chi (Smokeless Tobacco)

261

Dr. H. Lianthangpuia
State Nodal Officer,
National Tobacco Control Programme, Mizoram

Introduction:
Vaihlo kan han tih hian kan sawi tum ber chu zuk leh hmuam a ni tih chu kan hre tlang vek tawh awm e. Kan ram ngeiah pawh zuk leh hmuam hmang kan tamin, Global Adult Tobacco Survey (GATS) 2016 – 2017 a neihin a tarlan dan chuan Mizo zingah 58.7% (zaa sawmnga pariat) laiin zuk leh hmuam hi kan hmang mek a ni. Zuk leh hmuam hman avanga natna hrang hrang tuar pawh kan tam hle a, heng natna hrang hrang zingah hian Cancer vei pawh kan tamin India ramah pawh Cancer vei tam lamah pawh kan sang hle a ni. Meiziala tûr (chemical) hrang hrang awm te leh natna hrang hrang a thlen theih te chu kan hre teuh tawh awm e, tun tumah erawh vaihlo – hmuam/eichi lamin kan taksa a tihchhiat theih dan hrang hrangte rawn thai lan kan tum dawn a ni.

Vaihlo tobul:
Vaihlo hi America ram atanga lo chhuak niin Christopher Columbus-a ten Native America te an zuk hmuh chhuah khan heng vaihlo kan tih tak hi an lo hmang tawh a, hemi hnu hian Europe lamah rawn hawnin khawvel hmun hrang hrangah a lo darh ta zel a ni. India ramah chuan Portuguese sumdawngte hnen atangin kum 1600 AD velah a lo lut tan ve a ni, a tirah chuan vaihlo hi mi awm thei deuh hlekte zingah an hmang tan a, hemi hnu hian vantlang zingah intihhmuh chho zelin mi chi hrang hrang zingah a lo larin hmang an lo tam ta em em a ni. Tunlai kan thalaite zinga lar em em pakhat Gutkha (Tiranga, Shikhar etc) hi kuhva rah cheh nawi leh vaihlo chawhpawlh atanga siam chhuah niin kum 1970 vel atang khan India ramah hian an lo hmang tan tawh a ni.

Vaihlo – hmuam/ei chi chi hrang hrangte:
Kan hriat tlanglawn berah chuan vaihlo – hmuam/ei chi kan tihah hian sahdah, khaini, Gutkha, pan masala, tuibur leh Zarda te hi Mizote chuan kan hriat tam ber chu a ni awm e. India ramah chuan vaihlo rau rauah pawh a hmuam/eichi hi a zuk chi aiin a hluar zawk a, hmeichhe hmang an tamin fa nei thei tawh rual atanga tar thlengin he vaihlo hian a tibuai nasa em em a ni. Ram dangah chuan Snuff an tih vaihlo ro tih dip hi thil dang rimtui deuh nena chawhpawlhin an hnarin an hip lut thin, hemi bakah Snus an tih bawk snuff ang deuh thoa vaihlo dip tihhnawn deuh hi an hmui hnuaiah an dah thin, heng ho hi chu India ramah chuan an hmang ve vak lo.

Vaihlo – Hmuam/Ei chi a thil awmte: Vaihlo – Hmuam/Ei chi kan tihah hian tur (chemical) chi hrang hrang 3095 lai a awm a chung zinga 28 te chu Cancer thlen theitu an ni (Health Report by National Institute of Health & Family Welfare). Vaihloa cancer thlen theitu ber (carcinogen) chu N-nitrosamines an ti a, he tur hi hlauhawm em em mai a, eng ang taka mihring tana hlauhawm nge a nih chiah tih pawh hi an la hrechiang hlei thei meuh lo zawk a ni. A chunga kan sawi bakah hian chemical hlauhawm tak tak cancer thlen thei a la awm nual bawk a ni. Zirchiannain a sawi dan chuan vaihlo-hmuam/eichi India atanga siam chhuah pakhatah chuan Nitrosamine hi a tam hle tih an hmuchhuak bawk a ni.

Vaihlo – Hmuam/Ei chiin natna a thlen theih te (Health Effects):
Vaihlo Hmuam/Ei chi hian natna a thlen tam hle a; lu leh nghawng chhehvel bakah ka chhung lamah natna a thlen nasa zual hle a ni, chungte chu Aw bawm (larynx) cancer, hrawk/dang (pharynx) cancer, ka chhung cancer te, ka chhung cancer hmahruai an tih leukoplakia te, erythroplakia te, submocous fibrosis (ka reh zim tial tial) te a thlen thei a ni. Vaihlo – Hmuam/Ei chi chi hrang hrang sahdah, khaini, Tuibur, gutkha etc te hian a bik takin Nu naupai laiah thil tha lo a thlen nasa thei hle mai a, Nu naupai laiin vaihlo – hmuam/ei chi a naupai laia a hman chuan naupiang zang lutuk (low birth weight) a thlen thei a ni, hemi bakah hian chhan hriat loh a naute thih thutna (Sudden Infant Death Syndrome) a thlen thei bawk a ni.

Vaihlo – hmuam/ei chi hian lung natna a thlen thei a, hei hian stroke neih theihna a tisang hle bawk a ni, heng natna TB te, zunthlum te, asthma te, mit khaw lohna/mit pual te leh fa neih theih lohna thlengin a thlen in a tizual thei bawk a ni. Heng ka chhunga cancer hmahruaitua kan sawite leukoplakia te, erythroplakia leh submucous fibrosis kan sawite hi mitinten keimahni theuhin darthlalang hmanga kan inenfiah theih te an ni a, kan ka chhung en ila var tik tiak emaw, sen deuh tiak te a awm chuan doctor pan vat tur a ni, hengte hi cancer hmahruai an ni thei a, fimkhur a tha hle.

Vaihlo-hmuam/ei chi hian heng cancer hrang hrang ka chhung te, chaw kawng te, pumpui te, rilbawh te, hrawk te leh kal (kidney) te a thlen thei a ni. India rama zirchianna pakhatin a sawi dan chuan inthlahchhawnna thilah pawh vaihlo-hmuam/ei chi hmang mipa zingah chi (sperm quality/Sperm count) chak loh avanga fa neih theih loh phah an tam hle a, hemi bakah hian hmeichhe zingah pawh chhul hliam/pem an tam phah hle bawk an ti.

Heng natna hrang hrang kan sawi bakah hian natna dang tam tak pawh a thlen thei a ni tih kan hriat reng hi a tha bawk awm e. Kan sawi hmaih hauh loh tur pakhat chu Mizote chauhin kan neih Tuibur hi a ni awm e, Tuibur hi mizote hian kan hmang nasain tunhma atangin inlengte lo theh atan te an hmangin tun thleng pawhin mi tam tak chuan ha na damdawi atan a tha ti pawh an la tam khawp mai.

Tuiburah hian tûr tam tak a lo awm reng a ni tih hi mizote hian i hre thar theuh ang u, tuibur zuar pakhat hnen atanga an lei chhawn chu Indian Institute for Environmental Medicine, Mumbai in zirchianna an neihah chuan N-nitrosonornicotine (NNN) tam tak a awm a ni tih an hmuchhuak a ni. Kan hriatthiam theih dan tur chuan NNN kan tihah hian carcinogen (cancer thlentu) tam tak a awm a, heng cancer thlen theitu tam tak hi Tuibur ah hian a awm a ni tih kan hriat tel a tha awm e.

Kan sawi hmaih hauh loh tur pakhat chu tunlaia kan thalaiten an uar em em Gutkha (Tiranga, Shikhar etc) chungchang hi kan hriat tam a, nu leh pate pawhin kan fate he thil hman thatlohzia kan inzirtir nguna kan faten an hmang ve em tih kan chik a tul tak zet a ni.

Gutkha:
Gutkha hi thil chi hrang hrang kuhva cheh nawi te, vaihlo te, Elaichi/cardamom te, chinai te, sweet thil thlum te, rawng rimtui te leh chemical chi hrang hrang inchawhpawlh atanga siam a ni tlangpui a. India ram hmun hrang hrangah a hming hrang hrang puin hralh chhuah thin a ni.

Mizoramah erawh kan hriat lar deuh deuh te chu Tiranga leh Shikhar tih vel te hi an ni. Gutkha hi a nicotine content avang hian a ngawl vei (addict) a awl em em a; tin, a carcinogen content avangin cancer chi hrang hrang a thlen thei a, pumpui cancer, pumpui lawng, chaw dawt cancer, heart attack, ka chhung natna sub mucous fibrosis (ka bawr velah pan ang deuh, an that theih loh, a rei hnu chuan cancer-ah a chang thei) leh leukoplakia te pawh a thlen thei a ni. Gutkha hmuam/ei nasa chu an mut hun a mumal lova, an concentration te nasa takin an hloh thin a, lehkha zir lamah pawh an rilru a chak loh phah thei bawk a ni. Tin, ka chhung leh hahni te a tidumin a tibal a, a tenawm duh hle bawk a ni. Puipun nikhuain zirlaite zingah tlu tawp an awm thin a, heng mite hi an han zawh chian deuh chuan gutkha ei an lo ni duh tlangpui a, an gutkha ei khan an taksa a tichak lovin an han din rei deuh khan an luhai an tlu ta mai thin a ni.

Kan la hre vek kher lo mai thei a, Mizoramah hian gutkha lakluh hi sawrkarin a khap tlat lai a ni a, dawra zuar kan hriatte pawh hian dan an bawhchhia a ni tih an hriat a, an thil zawrh thin te an bansan hi a tul tak zet a ni. Hemi a nih avang hian gutkha hi kan theihtawpa kan do tlan a, Mizoram atanga kan umbo hi a tul tak zet a ni.

Mizoram bihchianna: GATS 2016 – 17 in a tarlan dan chuan vaihlo-hmuam/eichi hmang hi 33.5% an ni a, chung zingah chuan mipa 21.3% leh hmeichhia 46.0% an awm mek a ni. 21.6% zet te chuan ka chhunga dah/hmuam chi vaihlo an hmang mek bawk a ni. Vaihlo-hmuam/eichi hmang 37.5% te chu Health Care Provider (Hriselna lam khawihtute) ten an thil hman te nghei turin thurawn an lo pe tawh thin a ni. Vaihlo-hmuam/eichi hmang zingah 26.0% te chuan vaihlo tuamna bawm a vaukhanna (warning label) thu awm avangin an thil hman laite nghei an lo tum tawh thu an sawi bawk. Nitina hmang hi 27.9% an ni in, khaini hmang hi 11.1% leh Gutkha hmang hi 4.0% an awm mek bawk a ni. Tuibur emaw Gutkha emaw ka chhunga hmuam chi hmang mek hi 21.6% zet an awm bakah Pan masala hmang hi 0.8% an awm bawk. GATS zirchiannain a tarlan angin vaihlo hrim hrim zuk leh hmuam hi hmang kan la tam hle a, kan chhungkaw dinhmun leh zuk leh hmuam mana kan pawisa sen emaw, zuk leh hmuam kan hman avanga natna kan neih inenkawlnan a sum kan hman te hi a tam lutuk a ni tih hi vaihlo hmang thinte chuan chhut thin ila a tha ngawt ang.

Tlangkawmna:
Kan hriat theuh angin Mizote hian zuk leh hmuam hi kan hmang nasa em em mai a, GATS 2016 – 17 ah pawh India ram pumah 2-na kan la hauh pha a, kan thenawm state Tripura chu keini aiin an sang hram a ni. Sawrkar leh NGO hrang hrangte nena hmalak chhoh tak tak an nih hnu hian hma pawh kan sawn ve viauin hre mah ila tihtur tam tak a la awmin, a tam thei ang bera khua leh veng hrang hrangte hian zuk leh hmuam hman chungchangah hian inzirtirna nei tha ila, YMA thil emaw, hohhran lam thil tihnaah te sawi tam a pawimawh khawp mai, hetianga YMA leh kohhran lamin tan an lak ngat chuan hma kan sawn nasa viau pawhin a rinawm a ni.

Kan tu leh fate nakina kan ram hruaitu lo ni mai turte hi zuk leh hmuam laka kan tihfihlim theih chuan kan ram pawh a lo hriselin malsawmna pawh kan dawng ngei ang, chumi ti thei tur chuan mi zawng zawngin kan theihna zawn theuhah tan i la tlang ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy