Daily Newspaper

Vaimim chinna hmun tlawh

75

MJA Serchhip District chuan August 7 khan Hualtu leh Hmawngkawn rama Agriculture department enkawlna hnuaia vaimim chinna hmun an tlawh a, Farmers Interest Group hruaituten lo dawngsawngin vaimim chingtute chuan nikum lam aiin kuminah thar tam an inbeisei tih an lo hrilh.

Hualtu leh Hmawngkawn khuaa chhungkaw 80-te chuan Agriculture Department kaihhruaina hnuaiah vaimim (‘Project Vaimim’ an tih mai) an ching a, chhungkaw pakhatin vaimim chinna hi tin khat hmun aia zau hret nei vekin, tun thla (August) chhung hian an seng tawh dawn a ni.

Serchhip district chhung Hualtu leh Hmawngkawn khuate hian kuminah buh leh thlai rualin vaimim hi quintal tam thei ang ber thar an tum a, heng an vaimim chinte hi tun thla tawp hian a kung a, a char/a ro hunah sengin Kg. khat Rs.15 hisapin a hmunah (ramah) an hralh dawn a, Agriculture Department-in an leisak dawn a ni.

Heng khaw pahniha khuaa vaimim chingtute chuan an vaimim thar chu kg khat Rs.20 hisapa hralh theih hram an duh thu leh an feh kawng (agriculture link road) chu lirthei hmanga fur lai pawha zawh a nawm lehzual theih nan sawrkarin cheithatsak se an duhthu MJA-te hi an lo hrilh a ni.

Agriculture Department Serchhip buatsaihin August 7 vek khan SEDP hnuaia vaimim ching tur Serchhip district chhung khaw 7 atanga thlanchhuahte tan training neih a ni a. Mizoram sawrkar flagship programme – SEDP hmalakna in kumin hian Serchhip district-ah nasa zawka vaimim tharchhuak tura hma lak a ni a; Serchhip district atan bika SEDP hnuaia vaimim ching tur khaw pasarih thlan chhuah – Hmuntha, Khawbel, Lungpho, Hmawngkawn, Hualtu, Chhingchhip Mualpui leh Chhingchhip Venghlun atanga farmer-te chu vaimim chin leh enkawl dante, vaimim thar hnua phoro leh dahthat dan te zirtirna an pe a ni.

SEDP hnuaia vaimim an chinna tur ram hi tin/acre 475 a zau niin, vaimim quintals 3800 thar chhuah beisei a ni a, loneitute vaimim thar zawng zawng hi Agriculture Department chuan a hralhna a ngaihtuah sak vek dawn a ni.

THE AIZAWL POST
~Tualchhung~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy